საქართველოს პარლამენტმა ბათუმის შოთა რუსთაველის სახელმწიფო უნივერსიტეტს ქართული პარლამენტარიზმის საუკუნოვანი იუბილესადმი მიძღვნილი სამახსოვრო მედალიონი გადასცა. 100 წლის წინ შეიკრიბა საქართველოს დამფუძნებელი კრება, რომელმაც შექმნა იმ ეპოქისათვის გამორჩეულად პროგრესული კონსტიტუცია და კანონმდებლობა.
ბათუმის შოთა რუსთველის სახელწიფო უნივერსიტეტი პროექტის ფარგლებში „სილამაზე და ჯანსაღი გარემო ქალაქის ქუჩებში" გამწვანების აქციას შეუერთდა. ბსუ-ს რექტორის მოადგილემ თამარ სირაძემ და სტუდენტებმა ესტაკადის მიმდებარე ტერიტორიაზე 26 დეკორატიული ვაშლის, 3 ტყემლისა და 6 პალმის ხე დარგეს. პროექტი „სილამაზე და ჯანსაღი გარემო ქალაქის ქუჩებში „ა(ა)იპ" ბათუმის გამწვანებისა და ლანდშაფტური დაგეგმარების სამსახურის“ ორგანიზებით ხორციელდება.
ბათუმის შოთა რუსთველის სახელმწიფო უნივერსიტეტში უცხოელი სტუდენტების საზეიმო მიღება გაიმართა. გაზაფხულის სემესტრში, ბსუ-ში გაცვლითი პროგრამების ფარგლებში 17 უცხოელი სტუდენტი ისწავლის. სტუდენტებს უნივერსიტეტის რექტორი მერაბ ხალვაში, რექტორის მოადგილე თამარ სირაძე, რექტორის მოადგილე ნათია წიკლაშვილი, ფაკულტეტების დეკანები, სტრატეგიული განვითარებისა და საერთაშორისო ურთიერთობათა დეპარტამენტის თავმჯდომარე გიორგი თავამაიშვილი შეხვდნენ, უნივერსიტეტში სწავლის პირობები გააცნეს და წარმატებები უსურვეს. ღონისძიების დასრულების შემდეგ, ბსუ-ს ბენდმა უცხოელი სტუდენტებისათვის კონცერტი გამართა.
საქართველოს დემოკრატიული რესპუბლიკის დამფუძნებელი კრების (პარლამენტის) 100 წლის იუბილე ბათუმის შოთა რუსთაველის სახელმწიფო უნივერსიტეტში რამდენიმე ღონისძიებით აღინიშნა. უმაღლესი საგანმანათლებლო დაწესებულების პროფესორ-მასწავლებლებმა საჯარო ლექციები წაიკითხეს პირველი საკანონმდებლო ორგანოს მუშაობის აქტუალურ სკითხებზე და გაიხსნა ფოტოგამოფენა. გამოფენაზე წარმოდგენილი იყო ნიკო ბერძენიშვილის ინსტიტუტის მკველვარების მიერ მოპოვებული, დღემდე უცნობი სტამბულის ქართულ სავანეში დაცული ფოტომასალა და საქართველოს დემოკრატიული რესპუბლიკის დამფუძნებელი კრების ამსახველი ფოტოები. სტუდენტებსა და პროფესორ-მასწავლებლებს დამფუძნებელი კრების 100 წლის იუბილე უნივერსიტეტის რექტორმა მერაბ ხალვაშმა და აჭარის ა.რ. განათლების, კულტურისა და სპორტის მინისტრმა ინგა შამილიშვილმა მიულოცეს.
ბათუმის შოთა რუსთაველის სახელმწიფო უნივერსიტეტმა კამპანია „უნივერსიტეტი-სკოლას“ დაიწყო, რომელიც მიზნად ისახავს მოსწავლეებში საზოგადოებრივი ცნობიერების ამაღლებას. ბსუ-ს 80-მდე პროფესორი ერთი კვირის განმავლობაში ბათუმის, ხულოს, შუახევის, ქედის, ხელვაჩაურის, ქობულეთის საჯარო და კერძო სკოლის მოსწავლეებს პოპულარული ხასიათის ლექციებს წაუკითხავენ ისეთ აქტუალურ საკითხებზე, როგორიცაა: საქართველო ევროინტეგრაციის გზაზე, კონსტიტუცია და დემოკრატიული მმართველობა, ბულინგის გამომწვევი მიზეზები, თაობები და ღირებულებები, ლიტერატურა და კრიტიკული აზროვნება, ჯანსაღი ცხოვრების წესი, კულტურა და ცივილიზაცია, საერთაშორისო და ეროვნული ტურიზმი და სხვ. ბსუ-ს პროექტი აჭარის ა.რ. განათლების, კულტურისა და სპორტის სამინისტროს მხარდაჭერით ხორციელდება.
