გარემოს დაცვისა და სოფლის მეურნეობის სამინისტრომ „მწვანე და აგროსტიპენდიების“ პროგრამის ფარგლებში, ბსუ-ს პროფესიული საგანმანათლებლო პროგრამის „მებაღეობა" პროფესიულ სტუდენტ შუქრი კუტუბიძეს სტიპენდია გადასცა. საქართველოს 6 უნივერსიტეტიდან და 14 პროფესიული სასწავლებლიდან აგრარული მიმართულების 32 სტუდენტი 500, 1000 და 1500-ლარიანი სტიპენდიებით დაჯილდოვდა. „მწვანე და აგროსტიპენდიების“ პროგრამა, რომელსაც გარემოს დაცვისა და სოფლის მეურნეობის სამინისტროს გარემოსდაცვითი ინფორმაციისა და განათლების ცენტრი ახორციელებს, ხელს შეუწყობს გარემოსდაცვითი და აგრარული დეფიციტური პროფესიების პოპულარიზაციასა და წარჩინებული სტუდენტების წახალისებას. პროგრამის ფარგლებში, სტუდენტებს შესაძლებლობა აქვთ, მიიღონ პრაქტიკული გამოცდილება შესაბამის უწყებებში.

ქალთა მიმართ ძალადობის წინააღმდეგ 16-დღიანი კამპანიის ფარგლებში, ბათუმის შოთა რუსთველის სახელმწიფო უნივერსიტეტის პროფესიული სტუდენტებისა და სამოქალაქო განათლების მასწავლებლის ირაკლი მიქელაძის ორგანიზებით, ხორციელდება პროექტი „ქალთა მიმართ ძალადობა", რომლის მიზანია ქალთა უფლებებისა შესახებ ცნობიერების ამაღლება. პროექტის ფარგლებში, ბსუ-ს პროფესიული სტუდენტებისთვის შეხვედრა გამართეს სახალხო დამცველის ბათუმის ოფისის წარმომადგენელმა გიორგი ჩარკვიანმა და არასამთავრობო ორგანიზაცია „მწვანე სექტორის" პროექტების მენეჯერმა ციალა ქათამიძემ.

ბათუმის შოთა რუსთაველის სახელმწიფო უნივერსიტეტის პროფესიული პროგრამების მართვისა და უწყვეტი განათლების ცენტრს ბათუმის N1 საჯარო სკოლის მე-9 კლასის მოსწავლეები ეწვივნენ. ცენტრის პერსონალმა მოსწავლეებს ბსუ-ს პროფესიული საგანმანათლებლო პროგრამები, პროფესიული განათლების მიღების შესაძლებლობები და უპირატესობები გააცნო. შეხვედრის დასრულების შემდეგ, მოსწავლეებმა პროფესიული პროგრამების მართვისა და უწყვეტი განათლების ცენტრის მატერიალურ-ტექნიკური ბაზა დაათვალიერეს.

ბათუმის შოთა რუსთაველის სახელმწიფო უნივერსიტეტმა მონაწილეობა მიიღო საქართველოს სავაჭრო-სამრეწველო პალატის ორგანიზებით, სასტუმრო „შერატონში“ გამართულ ღონისძიებაში „პროფესიები ბიზნესისათვის“. ბსუ-ს პროფესიული პროგრამების მართვის და უწყვეტი განათლების ცენტრის წარმომადგენლებმა და პროფესიული საგანმანათლებლო პროგრამების სტუდენტებმა ღონისძიებაზე დამთვალიერებლებს პროფესიული საგანმანათლებლო პროგრამები, სწავლების პირობები, სერვისები და სტუდენტური ცხოვრება გააცნეს.

ქობულეთის მუნიციპალიტეტში, სოფელ ხალას საჯარო სკოლის ტერიტორიაზე აშშ-ის სოფლის მეურნეობის დეპარტამენტის (USDA) დაფინანსებითა და ბსუ-ს ექსტენციის ცენტრის ბაზაზე განხორციელებული საგრანტო კონკურსის „ჭკვიანი ფერმა ჩვენს სკოლაში“ ფარგლებში, ენდემური ხეხილის ნერგების გამოსაყვანი სასწავლო-სადემონსტრაციო სათბური გაიხსნა. სასწავლო-სადემონსტრაციო სათბური ბსუ-ს რექტორმა მერაბ ხალვაშმა, აშშ-ის სოფლის მეურნეობის დეპარტამენტის, აჭარის სოფლის მეურნეობისა და აჭარის განათლების სამინისტროს წარმომადგენლებთან და ექსტენციონისტებთან ერთად გახსნა.