ახალი ამბები

საერთაშორისო პროექტის ბიენალე-არტ პრეზენტაციის საპატიო სტუმრები - რომის ნატიფი ხელოვნების უნივერსიტეტის რექტორი, მოქანდაკე ალფიო მონჯელი, ტურინის სახელმწიფო სამხატვრო აკადემიის პროფესორი, ხელოვნებათმცოდნე ფრანჩესკო პოლი და თბილისის სახელმწიფო სამხატვრო აკადემიის პროფესორი, მოქანდაკე გიორგი ოჩიაური სახელმწიფო უნივერსიტეტის ხელოვნების ფაკულტეტის სტუდენტებს შეხვდნენ და მათთვის მასტერკლასები გამართეს თემებზე: „ჩემი შემოქმედება“ დიაპოზიტივებისა და კატალოგების ჩვენების თანხლებით - მოქანდაკე ალფიო მონჯელი (მასტერკლასი); ხელოვნების სისტემები - ფრანჩესკო პოლი (ლექცია).

შოთა რუსთაველის სახელმწიფო უნივერსიტეტში დაიწყო სკონსულტაციო პროგრამის, „10 კვირა აბიტურიენტებისათვის“ განხორციელება. კურსის მიზანია:დაეხმაროს აბიტურიენტებს ერთიანი ეროვნული გამოცდების საგნობრივ ტესტებზე მუშაობის პრაქტიკული უნარების ჩამოყალიბებაში; დაეხმაროს საგამოცდო პროგრამების რთული და პრობლემური საკითხების შესახებ თეორიული ცოდნის სრულყოფაში; უზრუნველყოს ცალკეულ საგნებში ტესტირებათა ჩატარება, ტესტირებათა შედეგების და ტიპიური შეცდომების ანალიზი აბიტურიენტებისთვის; პროგრამის მოქმედების ვადებია 25 აპრილი - 25 ივნისი.

25 აპრილს ბათუმის მერიის სტუდენტთა დასაქმების პროგრამა დაიწყო და ხუთ კვირას გაგრძელდება. შოთა რუსთაველის სახელმწიფო უნივერსიტეტის, ბათუმის სახელმწიფო საზღვაო აკადემიის და ბათუმის დამოუკიდებელი უნივერსიტეტის 400 სტუდენტს მიეცა მასში ჩართვის შესაძლებლობა. ისინი შაბათ-კვირას იმუშავებენ და სანაცვლოდ ორასლარიან ანაზღაურებას მიიღებენ. პროექტის ბიუჯეტი 200 000 ლარს შეადგენს.

ქრისტიანული კვლევის ცენტრის ორგანიზებით შოთა რუსთაველის სახელმწიფო უნივერსიტეტში ჩატარდა სამეცნიერო კონფერენცია - ,,ჩვენი სულიერების ბალავარი“, სადაც ბათუმელმა და ქუთაისელმა მკვლევარებმა წაიკითხეს მოხსენებები ქრისტიანული სარწმუნოების წიაღში განვითარებული კულტურისა და ხელოვნების შესახებ.

თიკერის სატყეო უბანში (ფიჭვნარი) წიწვოვანი მცენარეების დარგვით აღნიშნეს დედამიწის დღე რსუ საბუნებისმეტყველო მეცნიერებათა ფაკულტეტის სტუდენტებმა. საქართველოში ეს დღე ტრადიციულად 1991 წლიდან აღინიშნება. წელს აქციის ორგანიზატორები აჭარის გარემოსა და ბუნებრივი რესურსების დაცვის სამმართველო, სტუდენტური თვითმმართველობა და ბიოლოგიის დეპარტამენტი იყვნენ.