ახალი ამბები

2008 წლის რუსეთ-საქართველოს ომში დაღუპული გმირის, ბსუ-ს სტუდენტის, ვახტანგ გორგასლის I ხარისხის ორდენოსან ამირან მამალაძის ხსოვნისადმი მიძღვნილი ჩემპიონატი ჩატარდა ფუტსალში. ტურნირი ოლიმპიური სისტემით მიმდინარეობდა და მასში ბათუმის შოთა რუსთაველის სახელმწიფო უნივერსიტეტის სტუდენტებით დაკომპლექტებული 32 გუნდი მონაწილეობდა. ფინალურ შეხვედრაში ერთმანეთს გუნდები „NIGGAS”-ი და „ტურიზმი“ დაუპირისპირდნენ. პირველობა ანგარიშით 5:3, ტურიზმის ფაკულტეტის სტუდენტების სასარგებლოდ დასრულდა. ჩემპიონატი უმაღლესი საგანმანათლებლო დაწესებულების სტუდენტური თვითმმართველობისა და სტუდენტთა მხარდაჭერისა და მომსახურების სამსახურის ორგანიზებით გაიმართა.

რეჟისორი რობერტ სტურუა საგანმანათლებლო-სახელოვნებო პროექტის ,,სტურუას შექსპირის სამყარო“ ფარგლებში, ბათუმის შოთა რუსთაველის სახელმწიფო უნივერსიტეტის სტუდენტებსა და პროფესორ-მასწავლებლებს შეხვდა. უილიამ შექსპირის დაბადებიდან 450 წლის იუბილესადმი მიძღვნილ ღონისძიებაზე ცნობილმა რეჟისორმა საკუთარ შემოქმედებაზე, მსოფლიოს წამყვანი თეატრების სცენაზე მის მიერ დადგმულ სპექტაკლებსა და ინგლისელი დრამატურგის პიესების თარგმანის პრობლემატიკაზე ისაუბრა. შეხვედრა კითხვა-პასუხის რეჟიმში გაიმართა და ხელოვანმა აქტუალურ შეკითხვებს უპასუხა. ასევე შედგა რუსთაველის თეატრის მუზეუმში დაცული რობერტ სტურუას შექსპირული დადგმების ამსახველი ფოტომასალის ჩვენება. რუსთაველის თეატრისა და ბსუ-ს პროექტი ,,სტურუას შექსპირის სამყარო“ სტუდენტების ინტელექტუალურ და სულიერ განვითარებას ითვალისწინებს. იგი ახალგაზრდებისთვის საინტერესოს გახდის შექსპირის ტექსტების, თეატრალური დადგმების შესწავლასა და შემდგომ კვლევას. პროექტის ეგიდით გათვალისწინებულია რობერტ სტურუას სპექტაკლის ,,ჰამლეტი“ ვიდეოჩვენება.

ბათუმის შოთა რუსთაველის სახელმწიფო უნივერსიტეტის საპატიო დოქტორმა, ოქსფორდის უნივერსიტეტის პროფესორმა მაიკლ ვიკერსმა აჭარის ა.რ. განათლების, კულტურისა და სპორტის სამინისტროს დაფინანსებით უნივერსიტეტში საჯარო ლექციათა ციკლი დაიწყო ბერძნულ-რომაული და ბიზანტიური სამყაროს ისტორიის აქტუალურ საკითხებზე. ცნობილი მეცნიერი ხუთი დღის განმავლობაში მოხსენებებს წაიკითხავს შემდეგ თემებზე: „ვერცხლიდან კერამიკამდე: ოქრომჭედელთა გავლენა მეთუნეობაზე ძველ ათენში“, „რომაული მურინის ჭურჭელი: „დედამიწაზე არსებულ მასალათა შორის უძვირფასესი“, „კარიატიდები ათენის ერეხთეიონზე: ქრონოლოგიის და სიმბოლიკის საკითხისათვის“, „ლეპსის მაგნა: ქვიშაში აგებული რომაული ქალაქი და მოხეტიალე ქვები, მეორადი გამოყენება ანტიკურობაში“.

განათლების საერთაშორისო ცენტრის პროგრამების პრეზენტაცია ჩატარდა ბათუმის შოთა რუსთაველის სახელმწიფო უნივერსიტეტში. საქართველოს მთავრობის ადმინისტრაციის წარმომადგენელმა, პროგრამების კოორდინატორმა ნინო სულავამ სტუდენტებს საერთაშორისო სამაგისტრო და სადოქტორო პროგრამასა და საჯარო დაწესებულებაში დასაქმებულ პირთა კვალიფიკაციის ამაღლებისა და გადამზადების პროგრამაში მონაწილეობა შესთავაზა. ცენტრი 2014 წელს პრემიერ მინისტრის ირაკლი ღარიბაშვილის ინიციატივით დაარსდა და მიზნად ისახავს სახელმწიფოს განვითარების პრიორიტეტების გათვალისწინებით საერთაშორისო სტანდარტების შესაბამისი შესაბამისი მაღალკვალიფიციური სპეციალისტების მომზადებას.

შოთა რუსთაველის ეროვნული სამეცნიერო ფონდის გრანტის “კლარჯეთი“ (საგრანტო პროექტის სამეცნიერო ხელმძღვანელი პროფესორი მამია ფაღავა, მენეჯერი - პროფესორი მალხაზ ჩოხარაძე) ფარგლებში ბათუმის შოთა რუსთაველის სახელმწიფო უნივერსიტეტის ჰუმანიტარულ მეცნიერებათა ფაკულტეტის ქართველოლოგიის ცენტრის XI სამეცნიერო კონფერენცია გაიმართა. უმაღლესი საგანმანათლებლო დაწესებულების პროფესორ-მასწავლებლებმა, მკვლევარებმა და დოქტორანტებმა სესიაზე აგვისტოში, ისტორიულ სამხრეთ-დასავლეთ საქართველოში წარმოებული ათდღიანი ექსპედიციის შედეგები შეაჯამეს. კლარჯეთის სოფლებში მოპოვებული ფოლკლორული, დიალექტოლოგიური, ეთნოლოგიური, ონომასტიკური და მატერიალური კულტურის ძეგლების ამსახველი ფოტო-ვიდეო მასალები სამეცნიერო მიმოქცევაში სათანადო დამუშავების შემდეგ შევა და გამოყენებული იქნება კომპლექსურ მონოგრაფიაში „კლარჯეთი“.