აჭარის ა.რ მთავრობის თავმჯდომარე ზურაბ პატარაძე და აჭარის ა.რ განათლების, კულტურისა და სპორტის მინისტრი გიორგი თავამაიშვილი რექტორთან ერთად, ბათუმის შოთა რუსთაველის სახელმწიფო უნივერსიტეტის სტუდენტთა დახმარების პროგრამაში ჩართულ სტუდენტებს შეხვდნენ. რეგიონის აღმასრულებელი ხელისუფლების პირველმა პირმა ახალგაზრდებს სტუდენტთა დახმარებისა და უმაღლესი განათლების ხელშეწყობის პროგრამები გააცნო.
საქართველოს საუნივერსიტეტო ლიგის ჩემპიონატში გამარჯვებულ ბათუმის შოთა რუსთაველის სახელმწიფო უნივერსიტეტის ქვიშის ფრენბურთისა და საფეხბურთო ნაკრების წევრებს საჩუქრად სასტუმრო ‘’ლეოგრანდის’’ სპა ცენტრის უფასო ერთთვიანი აბონემენტები გადაეცათ. სპორტულ-გამაჯანსაღებელი პაკეტი ბსუ-ს სტუდენტებს რექტორმა მერაბ ხალვაშმა და შანგრილა სპას-ს ხელმძღვანელმა ოგუზხან გოკჩემ გადასცეს.
ტემპუსის პროექტის LMPH-ის ფარგლებში, ბათუმის შოთა რუსთაველის სახელმწიფო უნივერსიტეტს გრენობლის აკადემიის რექტორი მიშელ ბროსე და პროექტის კოორდინატორი, გრენობლის უნივერსიტეტის პროფესორი ჟან ნოელ პიშუ ეწვივნენ. სტუმრებმა უნივერსიტეტის რექტორთან მერაბ ხალვაშთან, ტურიზმის ფაკულტეტის დეკანთან როსტომ ბერიძესთან და პროფესორ-მასწავლებლებთან გამართულ შეხვედრაზე სამომავლო თანამშრომლობის მიმართულებებსა და გეგმებზე ისაუბრეს. ტემპუსის პროექტი „ტურიზმის ინდუსტრიის განვითარებისთვის პროფესიული, საბაკალავრო და სამაგისტრო პროგრამების დანერგვის ხელშეწყობა საქართველოში, აზერბაიჯანსა და მოლდავეთში“ 2013 წლიდან ხორციელდება და მიზნად ისახავს საქართველოში ტურიზმის საგანმანათლებლო პროგრამების შექმნას. LMPH-ი ითვალისწინებს ტურიზმის სასწავლო პროგრამებში სასტუმროს დარგის საგნების მოდიფიცირებას ევროპული აკრედიტაციისა შესაბამისად და ახალი სასწავლო მოდულების დანერგვას.
დღეს, ბათუმის შოთა რუსთაველის სახელმწიფო უნივერსიტეტში პორტოს (პორტუგალია) უნივერსიტეტის ქიმია-ბიოლოგიის მეცნიერებათა დოქტორის, მკვლევარის, პროფესორ ელიზიუ მანუელ კოშტას საჯარო ლექციათა ციკლი დაიწყო. საჯარო ლექცია თირკმლის ქრონიკულ დაავადებათა გავრცელებას, გამომწვევი მიზეზების დადგენას, დიაგნოსტიკასა და მკურნალობის თანამედროვე მეთოდებს მიეძღვნა. აგრეთვე, საუბარი შეეხო თირკმლის ტერმინალურ სტადიაზე მყოფი პაციენტებისათვის ცხოვრების ხარისხის გაუმჯობესებას.
დღეს, სასტუმრო „რადისონ ბლუში“ პროექტის „თანამედროვე კვლევითი პრაქტიკის გაძლიერება რეგიონულ სასოფლო სამეურნეო ინსტიტუტებში’’- ფარგლებში სამუშაო შეხვედრა გაიმართა. პროექტის მიზანია, რეგიონულ ინსტიტუტებს შორის გამოცდილების გაზიარება და რეგიონთაშორისი თანამშრომლობის გაღრმავება. შეხვედრაში მონაწილეობას ღებულობდა აჭარის ა.რ. სოფლის მეურნეობის მინისტრი ლაშა კომახიძე, ბათუმის შოთა რუსთაველის სახელმწიფო უნივერსიტეტის რექტორი, მერაბ ხალვაში და პრორექტორი სამეცნიერო დარგში ნათელა წიკლაშვილი.
