შოტოკან კარატეში ევროპის ჩემპიონატში მიღწეული წარმატებისა და უნივერსიტეტის პოპულარიზაციისათვის, ევროპის ჩემპიონი, ტექნოლოგიური ფაკულტეტის სტუდენტი, ბესიკ ჩხიკვაძე უნივერსიტეტის რექტორმა მერაბ ხალვაშმა საპატიო სიგელით დააჯილდოვა. აგრეთვე, ბესიკ ჩხიკვაძეს უნივერსიტეტი მიმდინარე წლის სწავლის საფასურს სრულად დაუფარავს.
საკონტაქტო სემინარი, რომელშიც საქართველოს 14 უნივერსიტეტი იყო ჩართული დასრულდა. სემინარი ჩატარდა ქალაქ კიევში ა. წ. 28-29 ნოემბერს. ის მიზნად ისახავდა სამომავლოდ ერთობლივი პროექტების დაგეგმვას როგორც ევროპელ, ისე რეგიონის სხვა ქვეყნების კოლეგებთან. სემინარს ესწრებოდა საგარეო ურთიერთობათა სამსახურის უფროსი ნანა ყურშუბაძე.
ოდესის ეკოლოგიის სახელმწიფო უნივერსიტეტის რექტორი სერგეი სტეპანენკო, საქართველოს ეკონომიკისა და მდგრადი განვითარების სამინისტროს ჰიდროგრაფიული სამსახურის უფროსი რევაზ ბაბილუა და ევროკავშირი-საქართველოს ბიზნეს საბჭოს (EUGBC) წარმომადგენელი აჭარაში თამაზ თურმანიძე ბათუმის შოთა რუსთაველის სახელმწიფო უნივერსიტეტს ეწვივნენ. უმაღლესი საგანმანათლებლო დაწესებულების რექტორთან მერაბ ხალვაშთან, რექტორის მოადგილესთან ნათია წიკლაშვილთან, საბუნებისმეტყველო მეცნიერებათა და ჯანდაცვის ფაკულტეტის დეკანთან მარინა ქორიძესთან და პროფესორ-მასწავლებლებთან გამართულ შეხვედრაზე სტუმრებმა სამომავლო გეგმებსა და ერთობლივი პროექტების შემუშავების შესაძლებლობებზე ისაუბრეს.
ბათუმში აზერბაიჯანის რესპუბლიკის გენერალურმა კონსულმა რაშად ფაილოღლუ ისმაილოვმა ბათუმის შოთა რუსთაველის სახელმწიფო უნივერსიტეტში საჯარო ლექცია წაიკითხა. დიპლომატმა საერთაშორისო ურთიერთობების სტუდენტებს დიპლომატიის ისტორიაზე, საქართველო-აზერბაიჯანის დიპლომატიურ ურთიერთობებზე, საერთაშორისო ორგანიზაციებსა და სამომავლო გეგმებზე ისაუბრა. მომხსენებელმა ყურადღება გაამახვილა აზერბაიჯანისა და საქართველოს მეგობრულ ურთიერთობებზე, თანამშრომლობასა და სტრატეგიულ პროექტზე - ბაქო-თბილისი-ჯეიჰანის ნავთობსადენი. კონსული საჯარო ლექციების ციკლს საერთშორისო ურთიერთოების სპეცილობის სტუდენტებისთვის დიპლომატიის აქტუალურ საკითხებზე გააგრძელებს.
ბათუმის შოთა რუსთაველის სახელმწიფო უნივერსიტეტის ტექნოლოგიური ფაკულტეტის მეორე კურსის სტუდენტი ბესიკ ჩხიკვაძე ევროპის ჩემპიონია შოტოკან კარატეში. პირველობამ სტარტი ბათუმში აიღო და მასში მსოფლიოს 35 ქვეყნის 1400 წარმომადგენელი მონაწილეობდა. სპორტსმენმა ფინალურ შეხვედრებში ყაზახ, თურქ, აზერბაიჯანელ მეტოქეებს სძლია და ევროპის ჩემპიონის ტიტული მოიპოვა. ბესიკ ჩხიკვაძე ასპარეზობას ფოთში დაგეგმილ საქართველოს ნაკრების შესარჩევ ტურნირში განაგრძობს. ბათუმის შოთა რუსთაველის სახელმწიფო უნივერსიტეტი ჩემპიონს ულოცავს გამარჯვებას და უსურვებს წარმატებებს.
