ახალი ამბები

საზოგადოებრივი მაუწყებლის აჭარის ტელევიზიისა და რადიოს დირექტორი ნათია კაპანაძე ბათუმის შოთა რუსთაველის სახელმწიფო უნივერსიტეტის რექტორთან მერაბ ხალვაშთან ერთად სხვადასხვა ფაკულტეტის სტუდენტებს შეხვდა. უწყების პირველმა პირმა ახალგაზრდებს აჭარის ტელევიზიასა და რადიოში გამოცხადებული სტაჟირების კონკურსი და არსებული ვაკანსიები წარუდგინა. სტუმარმა სტუდენტებს კონკურსში მონაწილეობის მისაღებად საჭირო პროცედურები გააცნო და სამომავლო პერსპექტივებზე ესაუბრა. ღონისძიების დასასრულს, ნათია კაპანაძემ უმაღლეს საგანმანათლებლო დაწესებულებაში არსებული ფოტო-ტელე სტუდია და სამონტაჟო ოთახი დაათვალიერა. ვიზიტის ფარგლებში სამომავლო თანამშრომლობა დაიგეგმა.

თანამშრომლობის მემორანდუმი გაფორმდა ბათუმის შოთა რუსთაველის სახელმწიფო უნივერსიტეტს, საქართველოს საზოგადოებრივი ჯანდაცვის ფონდსა და ორგანიზაცია „სთეფ ფორვარდს“ შორის. ხელშეკრულების ფარგლებში, ბსუ-ს ფსიქოლოგიის კლინიკის ბაზაზე „ბათუმის შოთა რუსთაველის სახელმწიფო უნივერსიტეტის ბავშვთა და ახალგაზრდების ადვოკატირების ცენტრი“ გაიხსნება. მხარეები ევროკავშირის მიერ დაფინანსებული პროექტის „ადვოკატირება ბავშვთა და ახალგაზრდების დასაცავად“ ფარგლებში ითანამშრომლებენ. მისი მიზანია ოჯახში ძალადობის და სექსუალური ძალადობის მსხვერპლი ბავშვებისა და ახალგაზრდების დახმარება თბილისში, ბათუმსა და ზუგდიდში. ბავშვზე ძალადობის, სექსუალური ძალადობის პრევენციის და შემთხვევათა დროული იდენტიფიცირების მიზნით დაიგეგმება ერთობლივი შეხვედრები, სემინარები და კონფერენციები.

ბათუმის შოთა რუსთაველის სახელმწიფო უნივერსიტეტი პროექტის „გაიზიარე არჩევნები -ინფორმირებული ახალგაზრდა-აქტიური ამომრჩეველი“ გამარჯვებულია. ბსუ-ს რექტორმა მერაბ ხალვაშმა და აჭარის განათლების, კულტურისა და სპორტის მინისტრმა ინგა შამილიშვილმა სტუდენტებს გამარჯვება მიულოცეს და მონაწილეებს სერტიფიკატები გადასცეს.

ბათუმის შოთა რუსთაველის სახელმწიფო უნივერსიტეტი შეუერთდა აჭარის ტელევიზიის "დილის ტალღის" აქციას „გაიღე სისხლი - გადაარჩინე სიცოცხლე“. სისხლის გადასხმის საქველმოქმედო აქციაში ბსუ-ს რექტორი მერაბ ხალვაში, სტუდენტები, პროფესორ-მასწავლებლები და ადმინისტრაციის წარმომადგენლები მონაწილეობდნენ. ღონისძიების მიზანია დახმარება გაუწიოს იმ პირებს, რომელთაც სისხლი ესაჭიროებათ, თითოეული ადამიანისგან უსასყიდლოდ გაღებული სისხლი მათ სიცოცხლეს გაუხანგრძლივებს. უნივერსიტეტისთვის საქველმოქმედო აქციები სისხლის ბანკის შესავსებად ტრადიციად იქცა და მომავალშიც გაგრძელდება. უნივერსიტეტი ლ. საყვარელიძის დაავადებათა კონტროლისა და საზოგადოებრივი ჯანმრთელობის ცენტრისგან სისხლის უსაფრთხოებისა და უანგარო დონორობის რეგულარული მხარდაჭერისათვის მადლობის სიგელითაა დაჯილდოებული.

დღეს, ბათუმის შოთა რუსთაველის სახელმწიფო უნივერსიტეტში საქართველოს ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრი ვიქტორ დოლიძე უნივერსიტეტის სტუდენტებს და პროფესორ-მასწავლებლებს შეხვდა.
შეხვედრას, რომელიც ევროკავშირში უვიზო მიმოსვლასთან დაკავშირებულ საკითხებს შეეხებოდა ბსუ-ს რექტორი მერაბ ხალვაში და აჭარის ა.რ განათლების, კულტურისა და სპორტის მინისტრი ინგა შამილიშვილი ესწრებოდნენ.