ახალი ამბები

დემოკრატიული ჩართულობის ცენტრების პროექტის „ადამიანის უფლებების საკითხებზე ინფორმაციის გაცვლის პროცესის გაუმჯობესება ცენტრსა და რეგიონებს შორის“ ფარგლებში ბათუმის შოთა რუსთაველის სახელმწიფო უნივერსიტეტში სემინარი ჩატარდა ადამიანის უფლებათა დაცვის საკითხებზე. სტუდენტებს უფლებების დაცვის სამდივნოს უფროსი ნატალია ჯალიაშვილი და ამავე სამდივნოს მრჩეველი თორნიკე დვალი სოციალური და სამოქალაქო-პოლიტიკური უფლებების ურთიერთდამოკიდებულებასა და მათი განუყოფლობის საკითხებზე ესაუბრენ. ყურადღება გაამახვილეს ასევე საქართველოს ევროინტეგრაციის პროცესის კონტექსტში სახელმწიფოს მზარდ სოციალურ პასუხისმგებლობაზე და სოციალური უფლებების რეალიზების მნიშვნელობაზე სამოქალაქო-პოლიტიკური უფლებების გათვალისწინებით.

ბათუმის შოთა რუსთაველის სახელმწიფო უნივერსიტეტში შოთა რუსთაველის ეროვნული სამეცნიერო ფონდის მიერ დაფინანსებული სამეცნიერო პროექტების - „დასავლეთ საქართველოში გავრცელებული კივის, ფეიჰოას, მოცვის და სხვა კენკროვნების ნაყოფის ქიმიური შედგენილობის შესწავლა მოკრეფის, შენახვის და შეფუთვის ოპტიმალური წესების დასადგენად“ და „ქართველ მუსლიმთა მატერიალური და სულიერი მემკვიდრეობა თურქეთში“ - შედეგების წარდგინება გაიმართა. პროექტში მონაწილე მკვლევრებმა და პროფესორ-მასწავლებლებმა სამწლიანი კვლევის შედეგად მოპოვებული სამეცნიერო მიღწევები შეაჯამეს და მათ მნიშვნელობაზე ისაუბრეს.

„მნიშვნელოვანი რეფორმები ნარკოპოლიტიკისა და მართლმსაჯულების სფეროში“-ამ თემაზე ბათუმის შოთა რუსთაველის სახელმწიფო უნივერსიტეტში ადამიანის უფლებების სწავლებისა და მონიტორინგის ცენტრის (EMC) ორგანიზებით შეხვედრა გაიმართა.

მოდულური სწავლების საკითხებზე ბათუმის შოთა რუსთაველის სახელმწიფო უნივერსიტეტში ტრენინგები დაიწყო. ერთი კვირის განმავლობაში ექსპერტი და კონსულტანტი შორენა ჯაფარიძე პროფესიული პროგრამების პროფესორ-მასწავლებლებსა და სხვადასხვა დარგის სპეციალისტებს ისეთ აქტუალურ საკითხებს გააცნობს, როგორიცაა: პროფესიული საგანმანათლებლო პროგრამის ჩარჩო დოკუმენტი, მოდულის სტრუქტურა და მოდულური სწავლების არსი, პროფესიული სწავლების თანამედროვე მიდგომები, პროფესიულ კვალიფიკაციათა ჩარჩო, კომპეტენციებზე დაფუძნებული სწავლების არსი, პროფესიული სტანდარტი, მოდულების ნაირსახეობანი (ზოგადი, პროფესიული სავალდებულო, არჩევითი).

არასამთავრობო ორგანიზაციის „ხელმისაწვდომი გარემო ყველასათვის“ აღმასრულებელმა დირექტორმა გიორგი ახმეტელმა ბათუმის შოთა რუსთაველის სახელმწიფო უნივერსიტეტში საჯარო ლექცია წაიკითხა თემაზე: „საქართველოში შშმ პირთა უფლებრივი მდგომარეობა“. მომხსენებელმა სტუდენტებს საქართველოში შშმ პირთა უფლებრივი მდგომარეობა გააცნო და ისაუბრა სამედიცინო და სოციალურ მიდგომებს შორის არსებულ განსხვავებაზე. გიორგი ახმეტელმა მსმენელებს გაუზიარა ამერიკის შეერთებულ შტატებში, მაკკეინის ინსტიტუტში მიღებული გამოცდილება. ორგანიზაცია „ხელმისაწვდომი გარემო ყველასათვის“ შშმ პირთა მოძრაობას წარმოადგენს და 2010 წლიდან შეზღუდული შესაძლებლობების მქონე პირების უფლებრივი მდგომარეობის გაუმჯობესებაზე მუშაობს.