ახალი ამბები

საქართველოს პარლამენტის საგარეო ურთიერთობათა კომიტეტის თავმჯდომარემ სოფიო ქაცარავამ, ადამიანის უფლებების დაცვის სამდივნოს უფროსმა მარიამ ჯაჯანიძემ და სახალხო დამცველის თანასწორობის დეპარტამენტის უფროსმა ქეთევან შუბაშვილმა ბათუმის შოთა რუსთაველის სახელმწიფო უნივერსიტეტის პროფესორ-მასწავლებლებთან და სტუდენტებთან ადამიანის უფლებათა დაცვის საკითხებზე შეხვედრა გამართეს. ღონისძიების მონაწილეებმა სოციალური და სამოქალაქო-პოლიტიკური უფლებების დამოკიდებულებაზე ისაუბრეს, სახელმწიფოს მზარდი სოციალური პასუხისმგებლობა განიხილეს საქართველოს ევროინტეგრაციის პროცესის კონტექსტში და სამოქალაქო-პოლიტიკური უფლებების განხორციელების გათვალისწინებით სოციალური უფლებების რეალიზების მნიშვნელობაზე იმსჯელეს.

განათლების საერთაშორისო ცენტრის სასტიპენდიო პროგრამების წარდგენა გაიმართა ბათუმის შოთა რუსთაველის სახელმწიფო უნივერსიტეტში. ცენტრის აკადემიური პროგრამების და საერთაშორისო პროექტების სამსახურის უფროსმა ნინო სულავამ სტუდენტებს პროგრამაში მონაწილეობის წესები და პირობები გააცნო. 2018-2019 სასწავლო წლისათვის განათლების საერთაშორისო ცენტრი განახორციელებს საერთაშორისო სამაგისტრო პროგრამებს, საერთაშორისო სადოქტორო პროგრამებს და საზღვარგარეთ კვალიფიკაციის ამაღლების პროგრამას.

საქართველოს პარლამენტის წევრმა, ფრაქცია „ქართული ოცნება-მრეწველების“ თავმჯდომემ სიმონ ნოზაძემ საჯარო ლექცია წაიკითხა თემაზე: „დამოუკიდებლობიდან თავისუფლებამდე: საქართველოს ორი დამოუკიდებლობა ერთ საუკუნეში, ქვეყნის პერსპექტივები და გამოწვევები ახალ საუკუნეში“. პარლამენტარმა საუბრისას ისეთ მნიშვნელოვან საკითხები განიხილა, როგორიცაა: საქართველო და საერთაშორისო გარემო, ქვეყნის ისტორიული კავშირი ევროპასთან, ექსტრემიზმი, რადიკალიზმი და ტერორიზმი მსოფლიოში და საფრთხეები საქართველოსთვის.

ბათუმის შოთა რუსთაველის სახელმწიფო უნივერსიტეტში ერაზმუს+-ის აკადემიური და ადმინისტრაციული პერსონალის გაცვლითი პროგრამის ფარგლებში, საერთაშორისო კვირეული გაიხსნა. ღონისძიების მიზანია უმაღლესი საგანმანათლებლო დაწესებულების ინტერნაციონალიზაციის ხელშეწყობა. საერთაშორისო კვირეულის მონაწილეები ბსუ-ს რექტორს მერაბ ხალვაშს, აჭარის ა.რ. განათლების, კულტურისა და სპორტის მინისტრს ინგა შამილიშვილსა და პროფესორ-მასწავლებლებს შეხვდნენ. ღონისძიების დასასრულს, სტუმრები ბსუ-ს მატერიალურ-ტექნიკურ ბაზას გაეცნენ, დაათვალიერეს სტომატოლოგიური კლინიკა, დასავლეთ საქართველოს რეგიონული ქრომატოგრაფიული ცენტრი, იმუნოგენეტიკის კაბინეტი, ფსიქოლოგიური და იურიდიული კლინიკები.

საქართველოს ვიცე-პრემიერი, საგარეო საქმეთა მინისტრი მიხეილ ჯანელიძე ნატოს დღეების ფარგლებში, ბათუმის შოთა რუსთაველის სახელმწიფო უნივერსიტეტში რექტორს მერაბ ხალვაშს, ადგილობრივი ხელისუფლების წარმომადგენლებს, პროფესორ-მასწავლებლებს, სტუდენტებსა და არასამთავრობო სექტორს შეხვდა. საგარეო საქმეთა მინისტრმა შეხვედრაზე საქართველოს ევროატლანტიკური ინტეგრაციის პროცესის მიმდინარეობაზე, პრიორიტეტებზე, არსებულ პროგრესზე ისაუბრა და ნატოსა და საქართველოს შორის არსებული მჭიდრო ურთიერთობები მიმოიხილა. ღონისძიებაზე მისასალმებელი სიტყვით წარსდგნენ აჭარის ა.რ. მთავრობის თავმჯდომარე ზურაბ პატარაძე, ბათუმის შოთა რუსთაველის სახელმწიფო უნივერსიტეტის რექტორი მერაბ ხალვაში და ნატოსა და ევროკავშირის შესახებ საინფორმაციო ცენტრის დირექტორი ნინო ბოლქვაძე.