ახალი ამბები

ბათუმის შოთა რუსთაველის სახელმწიფო უნივერსიტეტის სოციალურ და პოლიტიკურ მეცნიერებათა ფაკულტეტის სტუდენტი სალომე მელაძე დებატების რესპუბლიკური ტურნირის ტოპ სპიკერი გახდა, ხოლო იურიდიული ფაკულტეტის სტუდენტი თეონა მოსიძე საუკეთესო სპიკერების ათეულშია. საუკეთესო და აქტიური მოდებატის სერტიფიკატები გადაეცა ასევე ბსუ-ს10 სტუდენტს. საქართველოს პრეზიდენტი გიორგი მარგველაშვილი დებატების ახალგაზრდული კლუბების ქსელში გაწევრიანებული უნივერსიტეტების სტუდენტების მონაწილეობით გამართულ რესპუბლიკური ტურნირის ფინალურ შეხვედრას დაესწრო და გამარჯვებულები დააჯილდოვა.

ლადო ასათიანისა და ნელი დუმბაძის დაბადებიდან 100 წლის იუბილეს მიეძღვნა საღამო „ლადო ასათიანი და მისი მეგობრები“. ჰუმანიტარულ მეცნიერებათა ფაკულტეტის ქართული ფილოლოგიის მიმართულების სტუდენტებმა ლიტერატურულ-მუსიკალური კომპოზიციით გაიხსენეს ლადო ასათიანისა და ნელი დუმბაძის მეგობრობის ისტორია. ახალგაზრდებმა საიუბილეო საღამოზე წაიკითხეს ლადო ასათიანისა და ნელი დუმბაძის წერილები, ლექსები, შეასრულეს პოეტის ლექსებზე შექმნილი სიმღერები და დადგეს სცენა დავით კლდიაშვილის პიესიდან „დარისპანის გასაჭირი“.

ბათუმის შოთა რუსთაველის სახელმწიფო უნივერსიტეტს, საქართველოს ტექნიკურ უნივერსიტეტს, კონსორციუმ „ნოოსფერას“, გრიგოლ წულუკიძის სამთო ინსტიტუტს, რაფიელ დვალის მანქანათა მექანიკის ინსტიტუტს, ფერდინანდ თავაძის მეტალურგიისა და მასალათმცოდნეობის სამეცნიერო ინსტიტუტსა და სოხუმის ილია ვეკუას ფიზიკა-ტექნიკის ინსტიტუტს შორის თანამშრომლობის მემორანდუმი გაფორმდა. მხარეები ერთობლივად განახორციელებენ საპროექტო-საკონსტრუქტორო, სამეცნიერო, ექსპერიმენტულ, სამონტაჟო პროგრამებს. პროექტი მიზნად ისახავს ახალი თაობის დიდი მასშტაბის გასაშლელი კოსმოსური ნაგებობების, კოსმოსური რეფლექტორული ანტენების და მექანიზებული სწრაფად ასაგები ხიდების შექმნას, სადემონსტრაციო მასშტაბური მოდელების დამზადებას, სადემონსტრაციო დამხმარე სტენების აგებასა და დემონსტრირებას.

ბათუმის შოთა რუსთაველის სახელმწიფო უნივერსიტეტში ტექნოლოგიური ფაკულტეტის სტაჟიორები სტუდენტების პრაქტიკული გამოცდილების ანგარიშის პრეზენტაცია გაიმართა. აგრარული მიმართულების ათმა სტუდენტმა აჭარის ა.რ. სოფლის მეურნეობის სამინისტროს აგროსერვის ცენტრის სასათბურე, სადედე და სადემონსტრაციო მეურნეობებში 6-თვიანი ანაზღაურებადი სტაჟირება გაიარა. ღონისძიებას უნივერსიტეტის რექტორი მერაბ ხალვაში, აჭარის ა.რ. სოფლის მეურნეობის მინისტრი ავთანდილ მესხიძე, აგროსერვის ცენტრის დირექტორი გოჩა ბერიძე, უნივერსიტეტის აგრარული ფაკულტეტის დეკანი გიზო ფარცხალაძე, პროფესორ-მასწავლებლები და სტუდენტები ესწრებოდნენ.

ლექციათა ციკლი „საუბრები ევროპაზე“ ბათუმის შოთა რუსთველის სახელმწიფო უნივერსიტეტში „საბჭოთა წარსული კვლევის ლაბორატორია - სოვლაბის“ მკვლევრების დავით ჯიშკარიანისა და ირაკლი ხვადაგიანის საჯარო ლექციით - „დამფუძნებელი კრების წევრობიდან საბჭოთა რეჟიმის მსხვერპლამდე“ დასრულდა. ღონისძიების ფარგლებში გამოფენა გაიმართა საქართველოს პირველი რესპუბლიკის დამფუძნებელი კრების წევრების შესახებ და დაჯილდოვდნენ თავისუფალ ჟურნალისტთა სახლის მიერ გამოცხადებული ესეების კონკურსის „რატომ ევროპა“ მონაწილე სტუდენტები. ლექციათა ციკლი „საუბრები ევროპაზე“ თავისუფალ ჟურნალისტთა სახლმა აღმოსავლეთ-დასავლეთის მართვის ინსტიტუტის მხარდაჭერით და USAID-ის ფინანსური მხარდაჭერით პროექტის - „ანტიდასავლური პროპაგანდის წინააღმდეგ აჭარაში“ ფარგლებში ჩაატარა.