ახალი ამბები

ბათუმის შოთა რუსთაველის სახელმწიფო უნივერსიტეტში ბაკალავრიატის, მაგისტრატურის და დოქტორანტურის სტუდენტებისათვის საინფორმაციო შეხვედრა გაიმართა ERASMUS+ის გაცვლითი პროგრამის შესახებ. ბსუ-ს სტრატეგიული განვითარებისა და საგარეო ურთიერთობათა დეპარტამენტის უფროსის მოადგილემ ნანა ყურშუბაძემ პროგრამაში მონაწილეობის მსურველებს უცხოეთის უმაღლეს საგანმანათლებლო დაწესებულებებში სწავლების პირობები გააცნო და კონკურსში მონაწილეობისათვის საჭირო დოკუმენტაციის, პარტნიორი უნივერსიტეტების, ვადებისა და სტიპენდიების შესახებ მიაწოდა ინფორმაცია.

ბათუმის შოთა რუსთაველის სახელმწიფო უნივერსიტეტში I საერთაშორისო სამეცნიერო კონფერენცია - „აღმოსავლეთ ევროპის მულტიკულტურული სივრცე“ გაიხსნა. კონფერენციის მიზანია კულტურათშორისი დიალოგის, ურთიერთგავლენების, ენისა და ენობრივი პოლიტიკის, ლიტერატურის, თარგმანის, კულტურათა ურთიერთმიმართების წარსულისა და თანამედროვეობისა და სხვა აქტუალური ინტერდისციპლინური კვლევითი ტენდენციების გამოკვეთა, გაანალიზება, შეფასება და თანამედროვე მეთოდების ურთიერთგაზიარება. საერთაშორისო სესია ასევე ითვალისწინებს ახალგაზრდა მკვლევართათვის კვლევითი დიაპაზონის გაფართოებას, თანამედროვე მიმართულებებით სამეცნიერო საქმიანობის ხელშეწყობასა და პროფესიული ურთიერთკავშირის განვითარებას.

კომპანიის VRex Immersive დირექტორმა ნიკოლოზ როსტომაშვილმა და დამფუძნებელმა ნიკოლოზ გოგოჭურმა ბსუ-ს ტურიზმის ფაკულტეტის სტუდენტებს საქართველოს ინოვაციებისა და ტექნოლოგიების სააგენტოს ტექნოლოგიური კონკურსი „ჰაკატური“ წარუდგინეს.


ჰაკათონი გაიმართება 19,20, 21 ოქტომბერს, სადაც ბსუ-ს სტუდენტებს, სხვა უმაღლესი სასწავლო დაწესებულებების სტუდენტებთან ერთად შესაძლებლობა ექნებათ, ჩაერთონ საქართველოს მასშტაბით 10 რეგიონში მიმდინარე ონლაინ ჰაკათონში და წარმოადგინონ ტურიზმის სფეროში არსებული პრობლემების მოგვარების ინოვაციური გზები.


ჰაკათონის მიზანია ინფორმაციული და ინოვაციური ტექნოლოგიებით დაინტერესებული ახალგაზრდებისთვის პროფესიული განვითარებისა და რეალიზაციის პრაქტიკული შესაძლებლობების შექმნა.

ლიტერატურული კონკურსის „შემოდგომის ლეგენდის“ ფარგლებში მწერალმა დათო ტურაშვილმა ბათუმის შოთა რუსთაველის სახელმწიფო უნივერსიტეტის სტუდენტებთან ლიტერატურული შეხვედრა გამართა. კონკურსი თბილისის სახელმწიფო უნივერსიტეტისა და კომპანია „ჯეოსელის“ ერთობლივი პროექტია და მასში სხვადასხვა რეგიონის უმაღლესი საგანმანათლებლო დაწესებულების სამივე საფეხურის სტუდენტები მონაწილეობენ. მწერალმა შეხვედრაზე ახალგაზრდებს ლიტერატურული კონკურსი წარუდგინა, შემოქმედებით პროცესთან ერთად აქტუალურ საკითხებზე ესაუბრა და მათ შეკითხვებს უპასუხა.

ბათუმის შოთა რუსთაველის სახელმწიფო უნივერსიტეტში ახალი სასწავლო წელი დაიწყო. პირველკურსელებს სასწავლო წლის დაწყება უნივერსიტეტის რექტორმა მერაბ ხალვაშმა, აჭარის ა.რ. უმაღლესი საბჭოს თავმჯდომარემ დავით გაბაიძემ, აჭარის ა.რ. განათლების, კულტურისა და სპორტის მინისტრმა ინგა შამილიშვილმა მიულოცეს. თითოეულმა ფაკულტეტმა უნივერსიტეტის ეზოში მოაწყო გამოფენა, რომლის საშუალებით სტუდენტები გაეცნენ არსებულ სიახლეებსა და მიღწევებს. ასევე გაიხსნა სტუდენტური კაფე და სტუდენტთა სერვისების ერთიანი სივრცე, სადაც სტუდენტებს ერთი ფანჯრის პრინციპით მოემსახურებიან. უნივერსიტეტისა და გამომცემლობის „წიგნები ბათუმში“ ორგანიზებით შეხვედრა გაიმართა თანამედროვე ქართველ ავტორებთან: ალექსანდრე ლორთქიფანიძესა და მარიკა მამალაძესთან. ახალი სასწავლო წლის გახსნა მუსიკალურად ბსუ-ს ბენდმა გააფორმა.