საქართველოს პრემიერ-მინისტრი მამუკა ბახტაძე ბათუმის შოთა რუსთაველის სახელმწიფო უნივერსიტეტში სტუდენტებსა და დამამთავრებელი კლასების მოსწავლეებს შეხვდა. მთავრობის მეთაურმა ახალგაზრდებს განათლების მასშტაბური რეფორმის დეტალები გააცნო და მათ შეკითვებს უპასუხა. პრემიერმა განათლების პრიორიტეტულობის ბიუჯეტში ასახვის აუცილებლობასა და 21-ე საუკუნეში ადამიანური კაპიტალის განვითარების მნიშვნელობაზე გაამახვილა ყურადღება.
გერმანიის შვერინის უმაღლესი სასწავლებლის პროფესორს, „Solutions Holding GmbH“ აღმასრულებელ დირექტორს შტეფან გერჰარდს ბათუმის შოთა რუსთაველის სახელმწიფო უნივერსიტეტის აკადემიურმა საბჭომ საპატიო დოქტორის წოდება მიანიჭა. პროფესორმა შტეფან გერჰარდმა მნიშვნელოვანი წვლილი შეიტანა უნივერსიტეტის განვითარებაში, ტურიზმის მიმართულების საგანმანათლებლო და სამეცნიერო-კვლევითი პროგრამების განხორციელებაში, გერმანიში ბსუ-ს ტურიზმის ფაკულტეტის პროფესორ-მასწავლებლების სტაჟირებასა და სტუდენტების სწავლებაში. ტურისტულ ინდუსტრიაში კონსალტინგური საქმიანობისა და ცენტრალურ ევროპაში სერტიფიცირებული მრჩევლის 30-წლიანი გამოცდილებით პროფესორი შტეფან გერჰარდი ინდუსტრიის აღიარებულია ექსპერტია.
თბილისში, საბერძნეთის რესპუბლიკის საელჩოს ორგანიზებითა და ბათუმის შოთა რუსთაველის სახელმწიფო უნივერსიტეტთან თანამშრომლობით საბერძნეთის დამოუკიდებლობის 198-ე წლის იუბილე აღინიშნა. ღონისძიების ფარგლებში ბსუ-ს პროფესორ-მასწავლებელთა მონოგრაფიის „პონტოელი ბერძნები აჭარაში - წარსული და თანამედროვეობა" წარდგენა გაიმართა, ასევე მოეწყო აჭარაში მცხოვრებ ბერძენთა ყოფის ამსახველი ფოტოგამოფენა. უნივერსიტეტის რექტორმა მერაბ ხალვაშმა სტუმრებს მისასალმებელი სიტყვით მიმართა და ბერძენ ხალხს ისტორიული დღე მიულოცა. ღონისძიებას საქართველოს აღმასრულებელი, საკანონმდებლო ხელისუფლების წარმომადგენლები და დიპლომატიური კორპუსის წევრები ესწრებოდნენ.
ბათუმის შოთა რუსთაველის სახელმწიფო უნივერსიტეტმა „გაეროს ახალგაზრდული ასამბლეის“ დელეგატებს უმასპინძლა. პროექტის ფარგლებში კერძო და საჯარო სკოლების მოსწავლეებს ბსუ-ს რექტორის მოადგილე თამარ სირაძე, საზოგადოებასთან ურთიერთობის სამსახურის უფროსი ნინო დოლიძე სკოლის მოსწავლეებს შეხვდნენ, უნივერსიტეტის მისია, პრიორიტეტები, სწავლის პირობები, სამომავლო გეგმები გააცნეს და მომავალი სტუდენტების შეკითხვებს უპასუხეს. დასასრულს მოსწავლეებმა უნივერსიტეტის ინფრასტრუქტურა, ლაბორატორიები, კლინიკები დაათვალიერეს და ფაკულტეტების დეკანებისა და პროფესორ-მასწავლებლებისაგან მოისმინეს დეტალური ინფორმაცია მათთვის საინტერესო საკითხებზე. დელეგატებს სამახსოვრო საჩუქრებთან ერთად, „გაეროს ახალგაზრდულ ასამბლეაში“ მონაწილეობის სერტიფიკატები გადაეცათ.
ბათუმის შოთა რუსთაველის სახელმწიფო უნივერსიტეტის სტუდენტური თვითმმართველობისა და კავკასიის გარემოსდაცვითი არასამთავრობო ორგანიზაციების ქსელის (CENN-ის) ორგანიზებით ერთობლივი ღონისძიება „სუფთა გარემო“ მოეწყო. სტუდენტებმა ბათუმის ახალი ბულვარის ტერიტორიაზე შავიზღვის სანაპირო ზოლი დაასუფთავეს. CENN-ის წარმომადგენლებმა აქციის მონაწილეებს აირწინაღები, ხელთათმანები, მაისურები და პოლიეთილენის პარკები დაურიგეს. ღონისძიების ფარგლებში ბსუ-ს სტუდენტურმა თვითმმართველობამ სტუდენტებს სიგელები გადასცა.
