ახალი ამბები

საქართველოს პარლამენტის თავმჯდომარის მოადგილე ილია ნაკაშიძე, ბათუმის შოთა რუსთაველის სახელმწიფო უნივერსიტეტის რექტორი მერაბ ხალვაში და აჭარის ა.რ. ჯანმრთელობისა და სოციალური დაცვის მინისტრი ზაალ მიქელაძე ოფიციალური ვიზიტით რიზეს გუბერნიაში იმყოფებოდნენ. დელეგაციის წევრები გაეცნენ რიზეს საუნივერსიტეტო კლინიკის მუშაობის სპეციფიკას, დაათვალიერეს სამედიცინო ფაკულტეტი, თურქეთში სიდიდით მეორე სიმულაციის სასწავლო ცენტრი და შეთანხმდნენ სამომავლო თანამშრომლობაზე. უნივერსიტეტში ვიზიტისას დელეგაციის წევრები ასევე ეწვივნენ ქართული ენისა და ლიტერატურის დეპარტამენტს, სადაც შეხვედრა გამართეს ქართული ენის მიმართულების სტუდენტებთან და პროფესორ-მასწავლებლებთან.

ბათუმის შოთა რუსთაველის სახელმწიფო უნივერსიტეტში ერაზმუს+-ის აკადემიური და ადმინისტრაციული პერსონალის გაცვლითი პროგრამების ფარგლებში „ბსუ-ს მესამე საერთაშორისო კვირეული“ გაიხსნა. ღონისძიების მიზანია უმაღლესი საგანმანათლებლო დაწესებულების ინტერნაციონალიზაციის ხელშეწყობა. ვროცლავის ფიზიკური აღზრდის საუნივერსიტეტო სკოლის, ალექსანდრა სტულგინსკის უნივერსიტეტის, კვიძინის უნივერსიტეტის, სილეზიის ტექნოლოგიური უნივერსიტეტისა და რენე1-ის უნივერსიტეტის პროფესორები ბსუ-ს სტუდენტებისათვის ლექციებს წაიკითხავენ. კვირეულის ფარგლებში უცხოეთის საგარეო ურთიერთობათა სამსახურების წარმომადგენლები ჩაატარებენ ტრენინგებს გაცვლითი პროგრამების ეფექტურად მართვის საკითხებზე. ღონისძიება უნივერსიტეტის რექტორის მოადგილემ თამარ სირაძემ გახსნა. საერთაშორისო კვირეული ბსუ-ს სტრატეგიული განვითარებისა და საგარეო ურთიერთობათა დეპარტამენტის ორგანიზებით იმართება.

ბათუმის შოთა რუსთაველის სახელმწიფო უნივერსიტეტის სტუდენტი ნესტან ვარშანიძე სტუდენტური საპარლამენტო დებატების „ახალგაზრდობა ევროპისთვის“ ტოპ სპიკერი გახდა. დებატებში საუკეთესო მესამე მომხსენებლად - გვანცა ლომაძე, საუკეთესო მეოთხე მომხსენებლად - ამირან აბაშიძე, ხოლო საუკეთესო მეხუთე მომხსენებლად მამუკა სურმანიძე დასახელდა.

ბათუმის შოთა რუსთაველის სახელმწიფო უნივერსიტეტში აკადემიკოს ალექსანდრე ხარაზიშვილის საჯარო ლექციების ციკლი დაიწყო თემაზე: „ლექციები სიმრავლეთა თეორიაში, ზომის თეორიასა და კომბინატორულ გეომეტრიაში“. მომხსენებელი ხუთი დღის განმავლობაში სტუდენტებსა და პროფესორ-მასწავლებლებს თანამედროვე მათემატიკის განვითარებადი დარგების: სიმრავლეთა თეორიის, კომბინატორიული გეომეტრიისა და ზომის თეორიის აქტუალურ საკითხებს გააცნობს. ლექციების ციკლი აჭარის ა.რ. განათლების, კულტურისა და სპორტის სამინისტროს უმაღლესი განათლების ხელშეწყობის ქვეპროგრამის ფარგლებში იმართება.

საქართველოს უსაფრთხოების და განვითარების ცენტრის გამგეობის თავმჯდომარემ ლევან დოლიძემ ბათუმის შოთა რუსთაველის სახელმწიფო უნივერსიტეტში ევროპის დღეების ფარგლებში საჯარო ლექცია წაიკითხა თემაზე: „საქართველო ევროინტეგრაციის გზაზე“. მომხსენებელმა სხვადასხვა უმაღლესი საგანმანათლებლო დაწესებულების სტუდენტებს ევროკავშირის პროექტები, უსაფრთხოების საკითხები, საქართველოსთან თანამშრომლობის მიმართულებები, არსებული გამოწვევები და უვიზო რეჟიმთან დაკავშირებული საკითხები გააცნო. ლექციის დასრულების შემდეგ დისკუსია გაიმართა და ლევან დოლიძემ სტუდენტების შეკითხვებს უპასუხა.