ახალი ამბები

ბათუმის შოთა რუსთაველის სახელმწიფო უნივერსიტეტის ტურიზმის ფაკულტეტის 70 სტუდენტი სასწავლო პრაქტიკით გერმანიაში მიემგზავრება. ახალგაზრდებს პროექტში გამარჯვება მიულოცეს და წარმატებები უსურვეს ბსუ-ს რექტორმა მერაბ ხალვაშმა, აჭარის ა.რ. განათლების, კულტურისა და სპორტის მინისტრის მოადგილემ ალექსანდრე დავითაძემ და ტურიზმის ფაკულტეტის მასპინძლობის მენეჯმენტის დეპარტამენტის ხელმძღვანელმა როსტომ ბერიძემ. სტუდენტები 3 თვის განმავლობაში პრაქტიკას გერმანიის მაღალი კლასის სასტუმროებში გაივლიან და გაეცნობიან სასტუმროს ყველა ძირითადი სტრუქტურული ერთეულის ფუნქციონირებას.

ბათუმის შოთა რუსთაველის სახელმწიფო უნივერსიტეტში საუნივერსიტეტო სპორტული ტურნირი ჩატარდა. შეჯიბრში სხვადასხვა უმაღლესი საგანმანათლებლო დაწესებულების სტუდენტებთან ერთად აბიტურიენტები მონაწილეობდნენ. პირველობა მკლავჭიდში, წოლჭიმსა და ბაგირის გადაწევაში გაიმართა და მიზნად ისახავდა ჯანსაღი ცხოვრების წესის ხელშეწყობას. მკლავჭიდში I ადგილი 75 კგ წონით კატეგორიაში აბიტურიენტმა რამინ მარკოიძემ მოიპოვა, მძიმე წონით კატეგორიაში I ადგილი ბსუ-ს ეკონომიკისა და ბიზნესის ფაკულტეტის სტუდენტს გიორგი საფარიძეს ერგო. ბაგირის გადაწევაში ბათუმის შოთა რუსთაველის სახელმწიფო უნივერსიტეტის შვიდი სტუდენტისგან დაკომპლექტებულმა გუნდმა გაიმარჯვა. წოლჭიმში I ადგილი დაიკავა (140 კგ. ) და უნივერსიტეტის რეკორდი დაამყარა ბსუ-ს ტექნოლოგიური ფაკულტეტის სტუდენტმა მანუჩარ მარკოიძემ.

ბათუმის შოთა რუსთაველის სახელმწიფო უნივერსიტეტის ზუსტ მეცნიერებათა და განათლების ფაკულტეტის სტუდენტებმა წარმატებით იასპარეზეს კიბერუსაფრთხოების მეოთხე ეროვნულ ოლიმპიადაში - „Cyber Cub 2019“. საქართველოს იუსტიციის სამინისტროს მონაცემთა გაცვლის სააგენტოს ორგანიზებით გამართულ პირველობაში ქვეყნის მასშტაბით 42 გუნდი მონაწილეობდა. ათეულში ბსუ-ს 4 გუნდი გავიდა, წარმატებას მიაღწიეს ომარ კვესეიშვილმა, თემურ კახაძემ, გიორგი რომანაძემ, შოთა ქარცივაძემ, ანა სურმანიძემ, ელდარ ტარიელაძემ, ხვიჩა თებიძემ, კახი კახიძემ, არტემ მოწყობილმა, ლადო ხაბეიშვილმა, გიგლა ქამაშიძემ და დავით ხოჯავამ. უნივერსიტეტი ულოცავს სტუდენტებს გამარჯვებას და უსურვებს წარმატებებს.

გერმანიის ეკონომიკური გაერთიანება (DWV) ეგიდით, „სენიორ ექსპერტთა სერვისის“ (SES)-ის პროექტების მენეჯერი აღმოსავლეთ/ცენტრალურ ევროპასა და სამხრეთ კავკასიაში იულიანა შულერი და პროექტის მენეჯერი მარია ბრეგაძე ბათუმის შოთა რუსთაველის სახელმწიფო უნივერსიტეტის რექტორს მერაბ ხალვაშს შეხვდნენ. მხარეებმა შეხვედრაზე ქართულ-გერმანულ ურთიერთობებსა და საგანმანათლებლო მიმართულებით SES-ის როლსა და მნიშვნელობაზე ისაუბრეს. თანამშრომლობის ფარგლებში, ახალი სასწავლო წლიდან ბსუ-ში სხვადასხვა მიმართულებით გერმანელი ექსპერტები ლექციებს წაიკითხავენ.

საქართველოში იუნისეფის წარმომადგენელმა, დოქტორმა ღასან ხალილიმ ბათუმის შოთა რუსთაველის სახელმწიფო უნივერსიტეტში საჯარო ლექცია წაიკითხა თემაზე: „ბავშვის უფლებების კონვენცია 30 წლის შემდეგ - განვლილი გზა, მიღწევები და გამოწვევები“. მომხსენებლი სტუდენტებს ბავშვის უფლებათა კონვენციასა და ამ მნიშვნელოვანი დოკუმენტის შემდეგ მიღებულ მიღწევებზე ესაუბრა. 30 წლის წინ მსოფლიო ლიდერებმა ისტორიული გადაწყვეტილება - ბავშვის უფლებათა კონვენცია მიიღეს. ყველაზე ფართოდ რატიფიცირებულმა ადამიანის უფლებათა შეთანხმებამ ხელი შეუწყო მსოფლიოში მრავალი ბავშვის ცხოვრების ტრანსფორმაციას. საჯარო ლექცია ბავშვის უფლებათა კონვენციის 30 წლის იუბილესადმი მიძღვნილი მსოფლიო კამპანიის ფარგლებში გაიმართა.