ახალი ამბები

5-7ივლისის ჩათვლით, ბათუმის შოთა რუსთაველის სახელმწიფო უნივერსიტეტში კულტურის პოლიტიკის ექსპერტის კონსტანტინე ნაცვლიშვილის საჯარო ლექციების ციკლი ტარდება. ლექციებზე კონსტანტინე ნაცვლიშვილი განიხილავს ისეთ აქტუალურ თემებს როგორიცაა: „კულტურული ფასეულობების დაცვის ისტორიული და სამართლებრივი ასპექტები,“ „კულტურული მემკვიდრეობის დაცვის პრობლემები“, „ქალაქი და კულტურის პოლიტიკა“. ლექციის ფარგლებში გაიმართება ფილმის „ განძის მცველები“ ჩვენება და შედგება დისკუსია. ლექცია-სემინარებს ბსუ-ს სტუდენტები და საზოგადოების სხვა დაინტერესებული პირები ესწრებიან.

დასრულდა ბათუმის შოთა რუსთაველის სახელმწიფო უნივერსიტეტის სტუდენტთა სამეცნიერო კონფერენცია - 2021. უნივერსიტეტის რექტორმა მერაბ ხალვაშმა, ადმინისტრაციის ხელმძღვანელმა ნიკა ჩხარტიშვილმა, რექტორის მოადგილეებმა თამარ სირაძემ და ნათია წიკლაშვილმა, ფაკულტეტების დეკანებმა და დეკანის მოადგილეებმა კონფერენციის მონაწილეებს სერტიფიკატები გადასცეს. სტუდენტური კონფერენციის 19 სექციის 60 მონაწილე საპრიზო ადგილის მფლობელი გახდა, რომელთაც ფულადი ჯილდო გადაეცემათ. ბსუ-ს სამეცნიერო ფორუმის პირველ ადგილზე 20 სტუდენტი გავიდა, მეორე ადგილზე - 19, ხოლო მესამეზე - 21. სტუდენტურ კონფერენციაში 180-ზე მეტი სტუდენტი მონაწილეობდა.

ბათუმის შოთა რუსთაველის სახელმწიფო უნივერსიტეტში ადმინისტრაციის ხელმძღვანელის არჩევნები ჩატარდა. კენჭისყრაში მონაწილეობის მისაღებად საარჩევნო კომისიას რეგისტრაციისათვის ერთმა კანდიდატმა - ნიკა ჩხარტიშვილმა მიმართა. ადმინისტრაციის ხელმძღვანელობის კანდიდატმა ბსუ-ს აკადემიურ და წარმომადგენლობით საბჭოებს სამოქმედო გეგმა წარუდგინა და დასმულ შეკითხვებს უპასუხა. აკადემიურმა საბჭომ განიხილა უნივერსიტეტის ადმინისტრაციის ხელმძღვანელის თანამდებობაზე ნიკა ჩხარტიშვილის კანდიდატურა და ფარული კენჭისყრით, სიითი შემადგენლობის უმრავლესობით (10 ხმით) წარმომადგენლობით საბჭოს წარუდგინა დასამტკიცებლად. ფარული კენჭისყრით, სიითი შემადგენლობის უმრავლესობით (16 ხმით) მასვე დაუჭირეს მხარი წარმომადგენლობითი საბჭოს წევრებმა.

ბათუმის შოთა რუსთაველის სახელმწიფო უნივერსიტეტში „Erasmus+“-ის პროექტის „უნივერსიტეტების როლი რეგიონის განვითარებაში“ („Role of Universities in the Regional Development (RURD)“) ფარგლებში საერთაშორისო სამუშაო შეხვედრა ტარდება. შეხვედრაზე 10 რეგიონული უნივერსიტეტის წარმომადგენელი რექტორთა კონფერენციის დაარსების ხელშეკრულების საბოლოო ვარიანტს განიხილავს. პროექტის ფარგლებში იგეგმება რეგიონული პარტნიორობის სქემის რექტორთა კონფერენციის აკადემიური სტრუქტურის ჩამოყალიბება, რომლის პრეროგატივა იქნება საუნივერსიტეტო მისიით გათვალისწინებული დასახული მიღწევის გზებზე მსჯელობა, სტრატეგიული გეგმის ძლიერი და სუსტი მხარეების გაანალიზება და გამოცდილების გაზიარება.

საქართველოს განათლებისა და მეცნიერების მინისტრის მოადგილე თამარ ქიტიაშვილი ბათუმის შოთა რუსთაველის სახელმწიფო უნივერსიტეტს ეწვია და ბსუ-ს ახალ სასწავლო კორპუსში განთავსებული პროფესიული პროგრამების მართვის და უწყვეტი განათლების ცენტრი დაათვალიერა. მინისტრის მოადგილე სასწავლო პროცესის მიმდინარეობას ადგილზე გაეცნო და თითოეული პროგრამისთვის შექმნილი, ადაპტირებული აუდიტორიები, ლაბორატორიები, კომპიუტერული კლასები და სამკითხველო დარბაზები დაათვალიერა.