კოლუმბიის უნივერსიტეტის ჰარიმანის ინსტიტუტში ბათუმის შოთა რუსთაველის სახელმწიფო უნივერსიტეტის ასოცირებული პროფესორის, ხათუნა ბერიძის საჯარო სემინარი „ქართული ლიტერატურისა და თარგმანის ორმაგი მეტყველება“ გაიმართა ილიას სახელმწიფო უნივერსიტეტის პროფესორ ბელა წიფურიასთან ერთად. სემინარს მოდერაცია გაუწია ჰარიმანის ინსტიტუტის დირექტორმა, პროფესორმა ვ. იზმირლიევამ.

29-30 მარტს, ვირჯინიის უნივერსიტეტში (აშშ) გამართულ საერთაშორისო სიმპოზიუმში „Re-envisioning the Black Sea in Literature and Historiography: Backwater or oikoumenē?” მონაწილეობა მიიღეს ბსუ-ს ჰუმანიტარულ მეცნიერებათა ფაკულტეტის დეკანმა, ასოცირებულმა პროფესორმა თეონა ბერიძემ და თარგმანისა და ინტერდისციპლინური კვლევების ცენტრის ხელმძღვანელმა, ასოცირებულმა პროფესორმა ხათუნა ბერიძემ. სიმპოზიუმი ორგანიზებული იყო ვირჯინიის უნივერსიტეტის ბრაუნ-ფორმანის პროფესორის, ედით ქლუზის მიერ და მასში მონაწილეობდნენ როგორც აშშ-ს წამყვანი უნივერსიტეტების პროფესორები, ისე შავი ზღვის ქვეყნების უნივერსიტეტებიდან მიწვეული მკვლევრები. სიმპოზიუმი წარმოადგენს შავი ზღვის კულტურული, ლიტერატურული და მთარგმნელობითი კვლევების გაგრძელებას, რომელიც ბსუ-ში 2018 წელს დაიწყო როგორც „აღმოსავლეთ ევროპის მულტიკულტურული სივრცე“ .

საქართველოს პირველი პრეზიდენტის, ზვიად გამსახურდიას დაბადებიდან 85 წლისადმი მიძღვნილი დისკუსია გაიმართა ბათუმის აკაკი წერეთლის სახელობის ბიბლიოთეკაში. ბსუ-ს პროფესორებმა ოთარ გოგოლიშვილმა და ჯემალ კარალიძემ ღონისძიებაზე განიხილეს XX საუკუნის მეორე ნახევრის საქართველოში განვითარებული მოვლენები (1956 წლის 9 მარტის, 19678 წლის 14 აპრილის, 1989 წლის 9 აპრილის, 1990 წლის 28 ოქტომბრის მრავალპარტიული არჩევნების და სხვა) და ზვიად გამსახურდიას წვლილი, მისი მოღვაწეობა საქართველოს უზენაესი საბჭოს თავმჯდომარისა და საქართველოს პრეზიდენტის თანამდებობებზე, ასევე შეაფასეს 1991 წლის დეკემბრისა და 1992 წლის იანვრის მოვლენები.

10-16 მარტს, „ერაზმუს+“-ის გაცვლითი პროგრამის ფარგლებში, ბსუ-ს ჰუმანიტარულ მეცნიერებათა ფაკულტეტის ასისტენტ პროფესორი შოთა როდინაძე აკადემიური მობილობით იმყოფებოდა რუსეს ანგელ კანჩევის უნივერსიტეტში (ბულგარეთი). შოთა როდინაძემ ლექციები წაიკითხა და პრაქტიკული მეცადინეობები ჩაატარა II და III კურსის სტუდენტებთან ჰუმანიტარულ და პედაგოგიურ მეცნიერებათა მიმართულებებით. ვიზიტის ფარგლებში შოთა როდინაძე გაეცნო საგანმანათლებლო პროგრამებს, საუნივერსიტეტო ცხოვრებას, მიმდინარე სასწავლო პროცესსა და სიახლეებს, ასევე შეხვდა უნივერსიტეტის დეპარტამენტების, ლაბორატორიებისა, საგარეო ურთიერთობათა სამსახურის წარმომადგენლებს და დაიგეგმა სამომავლო თანამშრომლობის მიმართულებები.

ბათუმის შოთა რუსთაველის სახელმწიფო უნივერსიტეტში ფრანკოფონიის კვირეული ‘’ფრანკოფონია-2024’’ გაიხსნა. კვირეული სკოლის მოსწავლეების ნახატების გამოფენით დაიწყო და ფრანგული ენის კონკურსით გაგრძელდა. კონკურსში, სახელწოდებით ‘’Bonjour la France’’ რეგიონის საჯარო და კერძო სკოლის მოსწავლეები მონაწილეობდნენ. გამარჯვებულ მოსწავლეებს სერტიფიკატები კვირეულის დასკვნით ცერემონიაზე გადაეცემათ. კვირეულის ფარგლებში, 29 მარტს ბსუ-ში ფრანკოფონიის საუნივერსიტეტო სააგენტოს დასაქმების ფრანკოფონული ცენტრი (CEF) გაიხსნება, რომელიც ხელს შეუწყობს სტუდენტებსა და კურსდამთავრებულებს დასაქმებაში და სამეწარმეო უნარების განვითარებაში.