ბათუმის შოთა რუსთველის სახელმწიფო უნივერსიტეტის, დასაქმების ხელშეწყობის სახელმწიფო სააგენტოს, აჭარის დასაქმების სააგენტოსა და ბათუმის სახელმწიფო საზღვაო აკადემიის ორგანიზებით, სასტუმრო „შერატონ ბათუმში“ მასშტაბური დასაქმების ფორუმი გაიმართა. ფორუმში მონაწილეობდა აჭარაში ოპერირებადი 70-ზე მეტი კომპანია 2000-ზე მეტი ვაკანსიით. სტუდენტებსა და კურსდამთავრებულებს შესაძლებლობა ჰქონდათ, უშუალოდ დამსაქმებლისგან მიეღოთ ინფორმაცია სამუშაო გარემოს, პირობებისა და კარიერული განვითარების შესახებ.

ბსუ-ს რექტორმა, ტიტე აროშიძემ, ბსუ-ს ფოლკლორული გოგონათა ანსამბლ „თირინის" წევრები და ხელმძღვანელი თემურ დოლიძე მადლობის სიგელებით დააჯილდოვა. რექტორმა სტუდენტებს ფესტივალ „ჰარიდაში" გამარჯვება მიულოცა და შემდგომი წარმატებები უსურვა. ბსუ-ს ფოლკლორული ანსამბლი „თირინი” გამორჩეულია თავისი აქტიური შემოქმედებითი საქმიანობითა და სხვადასხვა ფესტივალზე მიღწეული წარმატებებით.

ბათუმის შოთა რუსთაველის სახელმწიფო უნივერსიტეტში სტუდენტური თეატრის სპექტაკლის „კურიერი" პრემიერა გაიმართა. სპექტაკლი მოგვითხრობს ახალგაზრდა კურიერზე, რომელიც ერთ-ერთი გამოძახების დროს ავარიაში მოხვდა და თავის ტრავმის გამო მისი კომიდან გამოყვანა ვერ ხერხდება. სპექტაკლში ასახულია მის ირგვლივ განვითარებული მოვლენები.

ბსუ-ს "რა? სად? როდის?" გაზაფხულის სეზონი დაიწყო. გაზაფხულის სეზონის პირველ ტურში მონაწილეობა მიიღო 41 სტუდენტურმა გუნდმა ყველა ფაკულტეტიდან, 1-მა სასკოლო გუნდმა და 6-მა ლეგიონერთა გუნდმა. პირველ ტურში გათამაშდა ბაკურ ჭელიძის საავტორო პაკეტი. ინტელექტუალური თამაში უნივერსიტეტში ტრადიციულად ყოველ პარასკევს 19:00-საათზე ტარდება.

ბსუ-ს საკალათბურთო გუნდი B ლიგა 2024-ის გამარჯვებულია. დღეს, უნივერსიტეტის რექტორი, ტიტე აროშიძე გამარჯვებულ სტუდენტებს შეხვდა, სპორტსმენებს A ლიგაში გადასვლა მიულოცა და მადლობის სიგელები გადასცა. 21 იანვარს, თბილისში, კალათბურთის აკადემიაში გამართულ ფინალურ შეხვედრაში, ბსუ-ს გუნდმა ბათუმის საზღვაო აკადემია დაამარცხა და გამარჯვება მოიპოვა.