საჯარო სამართლის იურიდიული პირის - ბათუმის შოთა რუსთაველის სახელმწიფო უნივერსიტეტის“აკადემიური პერსონალის სამსახურში მიღებისა და კონკურსის ჩატარების ერთიანის წესის შესახებ“ წარმომადგენლობითი საბჭოს 2012 წლის 25 დეკემბრის №03 გადაწყვეტილებაში ცვლილებებისა და დამატებების შეტანის თაობაზე...»»»

საჯარო სამართლის იურიდიული პირის - ბათუმის შოთა რუსთაველის სახელმწიფო უნივერსიტეტის აკადემიური პერსონალის სამსახურში მიღებისა და კონკურსის ჩატარების ერთიანი წესი...»»»

საქართველოს კათოლიკოს-პატრიარქის, უწმიდესისა და უნეტარესის ილია II-ის კურთხევით თბილისში, მახათას მთაზე, შენდება ივერიის ღვთისმშობლის ხატის ტაძარი და სავანე. უნივერსიტეტის თანამშრომლებს ეძლევათ აქციაში მონაწილეობის საშუალება... »»»

სრულიად საქართველოს კათოლიკოს-პატრიარქი, უწმიდესი და უნეტარესი ილია მეორე ბათუმის შოთა რუსთაველის სახელმწიფო უნივერსიტეტს ეწვია. უმაღლესი საგანმანათლებლო დაწესებულების აკადემიური საბჭოს გადაწყვეტილებით, მცხეთა-მთიანეთის მთავარეპისკოპოსსა და ბიჭვინთისა და ცხუმ-აფხაზეთის პიტროპოლიტს ილია II-ს საპატიო დოქტორის წოდება მიენიჭა. უნივერსიტეტის რექტორმა, პროფესორმა ალიოშა ბაკურიძემ, პატრიარქს დაბადებიდან 80 და აღსაყდრებიდან 35 წლის იუბილე მიულოცა, მის ღვაწლზე, უნივერსიტეტის განვითარებაში შეტანილ წვლილზე ისაუბრა, შოთა რუსთაველის მედალი და კრებული „აჭარული საუნჯე“ გადასცა. უწმიდესსა და უნეტარესს მიესალმენ აჭარის ა.რ მთავრობის თავმჯდომარე არჩილ ხაბაძე, უნივერსიტეტის ემერიტუს-პროფესორი შუშანა ფუტკარაძე, კულტურისა და ხელოვნების განვითარების ფონდის „წმიდა ანდრიას ჯვრის“ დირექტორი მათე ტაკიძე და სტუდენტი ქეთევან დევაძე. სრულიად საქართველოს კათოლიკოს-პატრიარქმა, უწმიდესმა და უნეტარესმა ილია მეორემ სტუდენტები, პროფესორ-მასწავლებლები და სრულიად საქართველო დალოცა და უნივერსიტეტს წმიდა ნიკოლოზის ხატი აჩუქა.... »»»

ხელოვნებისა და მუსიკის ცენტრში ბათუმის შოთა რუსთაველის სახელმწიფო უნივერსიტეტის სახალხო ქორეოგრაფიულ ანსამბლ ,,ტბეთის“ 60 წლისადმი მიძღვნილი საიუბილეო საღამო გაიმართა. სხვადასხვა თაობის მოცეკვავეებმა შეასრულეს ქორეოგრაფ ზურაბ სვანაძის მიერ დადგმული ფოლკლორული ცეკვები: “აჭარული“, „ქართული“, „ფარიკაობა“,“ყაზბეგური“, ,,ქალთა ხორუმი“, ,,მოხეური“, ,,ქალ-ვაჟთა“, ,,აფხაზური“, „თუშური“, ,,მთიულური“. უნივერსიტეტის რექტორმა, პროფესორმა ალიოშა ბაკურიძემ ანსამბლის მნიშვნელობაზე ისაუბრა და უმაღლესი საგანმანათლებლო დაწესებულების აკადემიური და წარმომადგენლობითი საბჭოების გადაწყვეტილება გააცნო. ბსუ-ში ჩარიცხულ „ტბეთის“ მოცეკვავე აბიტურიენტსა და ორ წარჩინებულ, სოციალურად დაუცველ სტუდენტს დაეხმარება სწავლის საფასურის დაფარვაში. უნივერსიტეტი ანსამბლს საჩუქრად გადასცემს საცეკვაო კოსტიუმებს და დაუფინანსებს გასტროლებს უცხოეთში. ,,ტბეთში“ მოღვაწეობისთვის ქორეოგრაფებს: ზურაბ სვანაძეს, ლაშა გოგიტიძეს, მუსიკოსებსა და ანსამბლის ყველა წევრს დიპლომები გადაეცა.... »»»

უნივერსიტეტის პროფესორ-მასწავლებლებმა, არ აჭარის განათლების, კულტურისა და სპორტის სამინისტროსა და მასწავლებელთა პროფესიული განვითარების ეროვნული ცენტრის წარმომადგენლებმა, საჯარო სკოლების დირექტორებმა და პედაგოგებმა ბათუმის შოთა რუსთაველის სახელმწიფო უნივერსიტეტში მასწავლებლის პროფესიული სტანდარტის სამუშაო ვერსია განიხილეს. საერთაშორისო კვლევასა და გამოცდილებაზე დაფუძნებულ ნორმატიულ დოკუმენტში ასახულია მაღალკვალიფიციური მასწავლებლისათვის საჭირო ცოდნა, უნარები და დამოკიდებულებები. მასწავლებლის პროფესიული სტანდარტის მიხედვით, უნივერსიტეტები მომავალი პედაგოგებისათვის სასწავლო პროგრამებს ამზადებენ და მასწავლებელთა პროფესიული განვითარებისათვის ტრენინგებს, სემინარებს, კონფერენციებს ატარებენ.

ერასმუს მუნდუსის აქტივობა 2 პროექტის "Euroeast" გაცვლით პროგრამაში პირველ სააპლიკაციო პერიოდში გაიმარჯვეს შემდეგმა სტუდენტებმა და პროფესორ მასწავლებლებმა იხ. დანართი

ამერიკის კორნელის უნივერსიტეტის პროფესორმა იაგო გოჩელეიშვილმა საჯარო ლექცია წაიკითხა თემაზე: "ლოკალიზმი და უნივერსალიზმი კავკასიელ რევოლუციონერთა მსოფლმხედველობაში: რუსეთის ორმაგი იმიჯი ყაჯართა ირანში მეოცე საუკუნის დასაწყისში". მკვლევარმა ბათუმის შოთა რუსთაველის სახელმწიფო უნივერსიტეტის სტუდენტებსა და პროფსორ-მასწავლებლებს მეოცე საუკუნის დასაწყისში რეგიონში განვითარებული მოვლენები გააცნო, წარმოადგინა საზოგადოებისათვის დღემდე უცნობი საარქივო მასალები. ისაუბრა კავკასიის რეგიონზე, რუსეთისა და ირანის იმპერიებსა და კონსტიტუციონალიზმის მნიშვნელობაზე ახალ სახელმწიფოებში. იაგო გოჩელეიშვილი ამერიკის წამყვან უნივერსიტეტში 2003 წლიდან კითხულობს ლექციებს აღმოსავლეთმცოდნეობაში. უცხოეთში მოღვაწე ქართველი პროფესორი ბსუ-ს ამერიკის საელჩოს ორგანიზებით ეწვია.

ბათუმის შოთა რუსთაველის სახელმწიფო უნივერსიტეტის ტურიზმის ფაკულტეტისა და აჭარის ა.რ. ტურიზმისა და კურორტების დეპარტამენტის ორგანიზებით IV საერთაშორისო სამეცნიერო-პრაქტიკული კონფერენცია: ,,ინოვაციები ტურიზმში: ეკონომიკა და ბიზნესი“ გაიხსნა. კონფერენციაზე საქართველოს წამყვანი უნივერსიტეტების, გერმანიის, თურქეთის, ნორვეგიის, ბელორუსიის, უკრაინის, რუსეთის, აზერბაიჯანის, ხორვატიის, ყირგიზეთის პროფესორები და ტურიზმის ინდუსტრიის წარმომადგენლები 100-ზე მეტ მოხსენებას წარმოადგენენ. კონფერენციის მიზანია ტურიზმში ინოვაციების დანერგვის პრობლემების გადაწყვეტისათვის მეცნიერების, სპეციალისტებისა და ბიზნესმენთა ერთობლივი ძალისხმევა. ფორუმი 9 ივნისს მუშაობას ტრაპიზონში გააგრძელებს. მონაწილეები ახალ ტურისტულ პროდუქტებს გაეცნობიან, გაიმართება დისკუსია. კონფერენციის ფარგლებში გათვალისწინებულია აჭარის ტურისტული პოტენციალის პოპულარიზაცია.... »»»

ბათუმის შოთა რუსთაველის სახელმწიფო უნივერსიტეტში ეკლესიის მოძღვრების საფუძვლების „ეკლესიის საუნჯის“ წარდგინება გაიმართა. გამოცემა ერთგვარი ვრცელი კატეხიზმოა და მიზნად ისახავს მკითხველისათვის მართლმადიდებლური მოძღვრების გაცნობას. წიგნში აღწერილია ქრისტიანული სარწმუნოების სწავლა-მოძღვრება, საღმრთო განგებულობით სამყაროს შექმნა, დანიშნულება და ფუნქციონირება. ნაშრომი განკუთვნილია მორწმუნეებისა და ქრისტიანობით დაინტერესებულთა ფართო წრისათვის და სრულიად საქართველოს კათოლიკოს-პატრიარქის, უწმიდესისა და უნეტარესის ილია II-ის 80 წლის იუბილეს ეძღვნება.

გრიგოლ რობაქიძის სახელობის უნივერსიტეტის ფილოსოფიისა და სოციალურ მეცნიერებათა კვლევითი ინსტიტუტის (პროფ. თენგიზ ირემაძე, პროფ. ჰელმუტ შნაიდერი, ასისტ.-პროფესორი გიორგი თავაძე) და ბათუმის შოთა რუსთაველის სახელმწიფო უნივერსიტეტის (პროფ. ლალი ზაქარაძე) ერთობლივი ორგანიზებით წიგნის: „ამერიკელ განმანათლებელთა პოლიტიკური ესეები (ბერჯამინ ფრანკლინი, ჯონ ადამსი, თომას ჯეფერსონი, ჯეიმს უილსონი, ბენჯამინ რაში)“ პრეზენტაცია გაიმართა. წიგნი ინგლისურიდან თარგმნა გიორგი ხუროშვილმა და სამეცნიერო რედაქტორები არიან: თენგიზ ირემაძე, ლალი ზაქარაძე, გიორგი თავაძე. ნაშრომი საქართველოში აშშ-ის საელჩოს წიგნების თარგმანის საგრანტო პროგრამის ფარგლებში გრიგოლ რობაქიძის სახელობის უნივერსიტეტის გამომცემლობამ გამოსცა. წიგნები საჩუქრად გადაეცა ბსუ ბიბლიოთეკას, სტუდენტებს, პროფესორ-მასწავლებლებსა და არასამთავრობო ორგანიზაციების ბიბლიოთეკებს.

ტექნოლოგიური ფაკულტეტის აგროეკოლოგიისა და სატყეო საქმის დეპარტამენტის ხელმძღვანელი, ასოცირებული პროფესორი დარეჯან ჯაში და სტრატეგიული განვითარების სამსახურის უფროსი, ასისტენტ პროფესორი თეონა ბერიძე ორდღიანი ვიზიტით როსტოკის უნივერსიტეტში (გერმანია) იმყოფებოდნენ. ვიზიტი მიზნად ისახავდა ტექნოლოგიების ფაკულტეტის აგრარულ მეცნიერებათა მიმართულების სასწავლო პროგრამების სრულყოფას, უცხოური გამოცდილების გაზიარებას, ერთობლივი სამეცნიერო და სასწავლო პროგრამების შემუშავებისა, სამომავლო თანამშრომლობის გაღრმავებისა და კონკრეტული სამოქმედო გეგმის შემუშავებას. როსტოკის უნივერსიტეტის აგრარულ მეცნიერებათა ფაკულტეტის დეკანთან, ბატონ ელმარ მოორთან გამართულ შეხვედრაზე დელეგაციის წევრებმა პრიორიტეტულ მიმართულებებზე: მემცენარეობაზე, გარემოს ინჟინერიასა და აქვაკულტურაზე ისაუბრეს.

ტემპუსის პროექტის „უნივერსიტეტი-წარმოება ურთიერთობის გაძლიერება კომპეტენციებზე დაფუძნებული სწავლების გზით“ ფარგლებში ბათუმის შოთა რუსთაველის სახელმწიფო უნივერსიტეტში სემინარი ჩატარდა თემაზე: „უნივერსიტეტისა და წარმოების თანამშრომლობა - გამოცდილებიდან სტრატეგიამდე“. სანტლივენის უმაღლესი კათოლიკური სკოლის პროფესორმა კრის ვან კერიმ (ბელგია), აალენის უნივერსიტეტის პროფესორმა კარინ კადოვიმ (გერმანია), გრენობლის აკადემიის პროფესორმა ესტერ გრუნკემაიჯერიმ (საფრანგეთი) და კოვენტრის უნივერსიტეტის პროფესორმა კუო მინგ ჩაომ (ინგლისი) სემინარის მონაწილეებს გაუზიარეს გამოცდილება უნივერსიტეტების ეკონომიკის სექტორთან თანამშრომლობისა და გამოყენებითი ხასიათის კვლევების, კვლევების კომერციალიზიის საკითხებში. ასევე გააცნეს აჭარაში არსებული რამდენიმე ორგანიზაციისა და უნივერსიტეტის თანამშრომლობის მაგალითები. პროექტის კოორდინატორმა, ასოცირებულმა პროფესორმა ლელა თურმანიძემ წარმოადგინა ბათუმის შოთა რუსთაველის სახელმწიფო უნივერსიტეტის ხედვა სტუდენტთა სტაჟირების, კურსდამთავრებულთა დასაქმებისა და ინოვაციური კვლევების წარმოებასთან დაკავშირებით. ... »»»