შოთა რუსთაველის სახელმწიფო უნივერსიტეტმა ბათუმის საჯარო და კერძო სკოლებში ღია კარის დღეები დაიწყო. უმაღლესი საგანმანათლებლო დაწესებულების პროფესორ-მასწავლებლები და სტუდენტები აბიტურიენტებისათვის პრეზენტაციებს მართავენ. მეთორმეტე კლასის მოსწავლეები უნივერსიტეტში სწავლების პირობებს, საგანმანათლებლო პროგრამებს, სტიპენდიებს, სოციალური და გაცვლით პროგრამებს, სამეცნიერო-კვლევითი საქმიანობას, სტუდენტური ცხოვრებასა და სიახლეებს ეცნობიან.
ბათუმის შოთა რუსთაველის სახელმწიფო უნივერსიტეტის განათლების ფაკულტეტის დაწყებითი განათლების სპეციალობის მესამე კურსის სტუდენტებმა ასისტენტ პროფესორ დარეჯან გელაძის ხელმძღვანელობით საქველმოქმედო აქცია „გავუთბოთ ერთმანეთს გულები“ მოაწყვეს. მომავალი პედაგოგები საპატრიარქოსთან არსებულ ფერიის წმინდა მატათა მოციქულის სახელობის ბავშვთა გიმნაზია-პანსიონს ეწვივნენ, აღსაზრდელებს შობა-ახალი წელი მიულოცეს, ტკბილეული და საკვები პროდუქტი გადასცეს. აქციის დასასრულს ბავშვებმა კონცერტი გამართეს და სტუდენტებთან სამახსოვრო ფოტოები გადაიღეს.
განათლების ფაკულტეტის დაწყებითი განათლების სპეციალობის მეოთხე კურსის სტუდენტებმა უნივერსიტეტში საახალწლო ნამუშევრების გამოფენა მოაწყვეს. გამოფენაზე წარმოდგენილი ნაკეთობანი ახალგაზრდებმა დაწყებითი განათლების საბაკალავრო საგანმანათლებლო პროგრამის არჩევით სასწავლო კურსის „სახვითი და გამოყენებითი ხელოვნება“ და სპეციალობის არჩევით მოდულის „ხელოვნება“ ფარგლებში დაამზადეს.
განათლების ადმინისტრირების სამაგისტრო საგანმანათლებლო პროგრამის სასწავლო კურსის „ფინანსები განათლებაში“ ფარგლებში ბათუმის რესურსცენტრის მთავარი სპეციალისტი შადიმან შერვაშიძე განათლების ფაკულტეტის სტუდენტებს შეხვდა. სტუმარმა ახალგაზრდებს საგანმანათლებლო დაწესებულებათა სახელმწიფო შესყიდვების განხორციელების წესი და არსებული სიახლეები გააცნო. ღონისძიება კითხვა-პასუხის რეჟიმში წარიმართა და შადიმან შერვაშიძემ სტუდენტების შეკითხვებს უპასუხა.
მასწავლებელთა პროფესიული განვითარების ეროვნული ცენტრისა და „ათასწლეულის გამოწვევის ფონდი - საქართველო“-ს ორგანიზებით ყვარელში, იუსტიციის სასწავლო ცენტრის სასტუმრო კომპლექსში გამართულ მედია-სემინარში მონაწილეობა მიიღო განათლების ფაკულტეტის ხარისხის უზრუნველყოფის სამსახურის უფროსმა, ასოცირებულმა პროფესორმა ნანა მაკარაძემ. ორდღიანი სემინარის ფარგლებში მონაწილეები გაეცნენ ზოგადი განათლების აქტუალურ საკითხებს, ცენტრის საქმიანობას, მასწავლებლის პროფესიული განვითარებასა და კარიერული წინსვლის სქემას. მედია-სემინარზე განათლებისა და მეცნიერების მინისტრის მოადგილემ ლია გიგაურმა ზოგადი განათლების მიმართულებით განხორციელებულ და დაგეგმილ პროექტებსა და პროგრამებზე ისაუბრა.
