ბათუმის შოთა რუსთაველის სახელმწიფო უნივერსიტეტის ემერიტუს-პროფესორის, სამხრეთ-დასავლეთ საქართველოს სამეცნიერო-კვლევითი ცენტრის უფროსი მეცნიერ-თანამშრომლისა და ღვაწლმოსილი პროფესორის მერი ცინცაძის 85 წლისადმი მიძღვნილი საიუბილეო სხდომა გაიმართა შოთა რუსთაველის დარბაზში. მკვლევარს იუბილე მიულოცეს, წარმატებები უსურვეს და მის ღვაწლზე ისაუბრეს უნივერსიტეტის რექტორის მოვალეობის შემსრულებელმა მერაბ ხალვაშმა, პროფესორ-მასწავლებლებმა და სტუდენტებმა. პროფესორ მერი ცინცაძეს მნიშვნელოვანი წვლილი მიუძღვნის ენათმეცნიერების განვითრებაში, გამოქვეყნებული აქვს ათეულობით სამეცნიერო ნაშრომი და მონოგრაფიები, ეწევა სარედაქციო საქმიანობას. ცნობილ მეცნიერს წილად ხვდა ქართველ მკვლევართა შორის პირველად ესაუბრა კლარჯული კილოს შესახებ, სამეცნიერო მიმოქცევაში შემოეტანა ქართული ენათმეცნიერებისათვის უცხო დიალექტის მასალები.

ბათუმის შოთა რუსთაველის სახელმწიფო უნივერსიტეტში სემინარი ჩატარდა თემაზე: „ართვინის მეჩეთები“. ჰუმანიტარულ მეცნიერებათა ფაკულტეტის ასოცირებულმა პროფესორმა ზაზა შაშიკაძემ და ისტორიის აკადემიურმა დოქტორმა რუსლან ბარამიძემ სტუდენტებს და პროფესორ-მასწავლებლებს შოთა რუსთაველის ეროვნული სამეცნიერო ფონდის მიერ დაფინანსებული სამეცნიერო გრანტის „ქართველ მუსლიმთა მატერიალური და სულიერი მემკვიდრეობა თურქეთში“ (საგრანტო ხელშეკრულება #57/06) ფარგლებში მიმდინარე წლის სექტემბერ-ოქტომბერში თურქეთის რესპუბლიკაში, ართვინის ილში ჩატარებული საველე სამუშაოების შედეგები გააცნეს.

„სტუდენტური ასოციაციის“ ორგანიზებითა და სტუდენტთა სამეცნიერო ცენტრის მხარდაჭერით ბათუმის შოთა რუსთაველის სახელმწიფო უნივერსიტეტში ჰუმანიტარულ მეცნიერებათა ფაკულტეტის ისტორიის სპეციალობის სტუდენტების ფოტოგამოფენა გაიხსნა. ახალგაზრდებმა დამთვალიერებელს საველე პრაქტიკის დროს, ფიჭვნარის, გონიოსა და სხვა არქეოლოგიური საველე გათხრების წარმოებისას აღმოჩენილი მასალების ამსახველი 50-მდე ფოტო წარუდგინეს.

ფრანგული ინსტიტუტის ატაშე საუნივერსიტეტო და სამეცნიერო თანამშრომლობის საკითხში კოლა კაბრიელი საქართველოს ფრანგული ინსტიტუტის ლინგვისტური და საგანმანათლებლო პროგრამების კოორდინატორ ქეთევან ქურციკიძესთან ერთად ბათუმის შოთა რუსთველის სახელმწიფო უნივერსიტეტს ეწვია. რექტორის მოვალეობის შემსრულებელთან მერაბ ხალვაშთან, საერთაშორისო ურთიერთობათა და სტრატეგიული განვიატრების სამსახურის უფროსთან ნანა ყურშუბაძესთან, ჰუმანიტარულ მეცნიერებათა ფაკულტეტის დეკანთან მარინა გიორგაძესთან და ფრანგული ფილოლოგიის მიმართულების ხელმძღვანელთან ნატალია სურგულაძესთან გამართულ შეხვედრაზე სტუმარმა სამომავლო გეგმებზე ისაუბრა. დაიგეგმა გაცვლითი პროგრამებისა და მობილობის ხელშეწყობა, ერასმუს+-ის პარტნიორ უნივერსიტეტებთან თანამშრომლობის დამყარება და საფრანგეთის უნივერსიტეტებთან მემორანდუმის გაფორმება. მხარეთა შეთანხმებით, სამაგისტრო პროგრამების ყველა მიმართულების სტუდენტებისათვის ამოქმედდება საფრანგეთის მთავრობის მიერ გამოყოფილი სტიპენდიები, შემუშავდება და განხორციელდება ერთობლივი პროექტები.

ბათუმის შოთა რუსთაველის სახელმწიფო უნივერსიტეტის ჰუმანიტარულ მეცნიერებათა ფაკულტეტის სლავისტიკის დეპარტამენტში ჩატარდა რუსული ლიტერატურის წლისადმი მიძღვნილი ღონისძიება „რუსი მწერლები და პოეტები ბათუმში“. სტუდენტებმა წარმოადგინეს ო. მანდელშტამის, მ. ბულგაკოვისა და ს. ესენინის შემოქმედებითი ბიოგრაფიის ბათუმური პერიოდი. ახალგაზრდებმა ისაუბრეს მათი ბათუმში ჩამოსვლის მიზეზებზე, გააანალიზეს, წაიკითხეს მათ მიერ ბათუმში და ბათუმზე დაწერილი ლექსები და შეასრულეს სიმღერები. ღონისძიების მონაწილეებმა ხაზი გაუსვეს ბათუმის როლს რუსი ლიტერატორების შემოქმედებით ბიოგრაფიაში. XX საუკუნის პირველი მესამედის პოლიტიკურ-სოციალურმა ქარტეხილებმა ქალაქს საკმაოდ საინტერესო ფუნქცია მიანიჭა – რუსი პოეტები და მწერლები ამ ქალაქის გავლით უცხოეთში მოხვედრას გეგმავდნენ. მაგრამ სწორედ აქ იფილტრებოდა რუს მწერალთა მისწრაფება უცხოეთისადმი, აქ აკეთებდნენ არჩევანს და ამ არჩევანის შედეგად შეინარჩუნა რუსულმა ლიტერატურამ ამ პოეტების სახელები. ღონისძიება ჰუმანიტარულ მეცნიერებათა ფაკულტეტის ორგანიზებით გაიმართა.