გერმანული ენის მასწავლებელთა დღეები გაიმართა ბათუმის შოთა რუსთაველის სახელმწიფო უნივერსიტეტში სლოგანით „გერმანული ენა განათლების სისტემაში“. გოეთეს ინსტიტუტის ექსპერტებმა სკოლის დირექტორებთან და გერმანული ენის პედაგოგებთან ერთად გერმანული ენის, როგორც სასკოლო საგნის შესაძლებლობებსა და მასთან დაკავშირებულ პერსპექტივებზე იმსჯელეს. ორდღიანი ღონისძიების ფარგლებში ბსუ-ში განათლების გამოფენა მოეწყო და ვორკშოპი ჩატარდა თემებზე: თანამედროვე სკოლის პროფილი პროექტზე ორიენტირებული გაკვეთილი, CLiL - გერმანული ენის ინოვაციური სწავლება და ლიტერატურული მოკლე ტექსტები გერმანული ენის გაკვეთილზე, დიგიტალური სწავლა, აღმოჩენის გზით სწავლა.

ბათუმის შოთა რუსთაველის სახელმწიფო უნივერსიტეტში საერთაშორისო სამეცნიერო კონფერენცია გაიხსნა თემაზე: „ჰუმანიტარული მეცნიერებები ინფორმაციულ საზოგადოებაში-III“. ქართველი და უცხოელი მკვლევარები სამი დღის განმავლობაში განიხილავენ ისეთ აქტუალურ თემატიკას, როგორიცაა: ინტერდისციპლინური და ინტერკულტურული მიდგომები, ეროვნული თვითმყოფადობა და კულტურული მრავალფეროვნება, კორპუსული ლინგვისტიკა და დიგიტალური ჰუმანიტარია. სესიის მუშაობაში მონაწილეობას ღებულობს 200-ზე მეტი ქართველი მეცნიერი საქართველოს სხვადასხვა უნივერსიტეტიდან, 20-მდე უცხოელი (იაპონიიდან, იტალიიდან, დიდი ბრიტანეთიდან, პოლონეთიდან, ბულგარეთიდან, თურქეთიდან, აზერბაიჯანიდან, უკრაინიდან) და 40-მდე დოქტორანტი. ახალგაზრდა მკვლევარებისათვის დაგეგმილია პოსტერ-მოხსენებათა სესია და მრგვალი მაგიდა.

ბათუმის შოთა რუსთაველის სახელმწიფო უნივერსიტეტში საფრანგეთის გაცვლითი პროგრამების წარდგენა გაიმართა. საქართველოს ფრანგული ინსტიტუტის წარმომადგენელმა ნათია მსხალაძემ და საფრანგეთის საელჩოს საუნივერსიტეტო და სამეცნიერო ატაშემ ელეონორ გარნიემ სტუდენტებსა და პროფესორ-მასწავლებლებს საფრანგეთის უმაღლესი განათლების სისტემა, სასწავლო პროგრამები და სტიპენდიები გააცნეს. ღონისძიების დასასრულს მომხსენებლებმა ახალგაზრდებს საფრანგეთში სწავლის გამოცდილება გაუზიარეს და შეკითხვებს უპასუხეს.

ზვიად ჭუმბურიძის წიგნის „ათონი პატრიარქის გაზაფხული“ წარდგენა გაიმართა ბათუმის შოთა რუსთაველის სახელმწიფო უნივერსიტეტში. ავტორმა სტუდენტებსა და პროფესორ-მასწავლებლებს წიგნზე მუშაობის ისტორია და ისტორიული ვიზიტის დეტალები გააცნო. ნაშრომი უწმიდესის და უნეტარესის, სრულიად საქართველოს კათოლიკოს-პატრიარქის ილია II-ის 2004 წლის მაისის ათონის მთის ვიზიტს მიეძღვნა. ათონის მთას ქრისტიანულ მართმადიდებლურ რელიგიაში განსაკუთრებული მნიშვნელობის ადგილი უკავია. ივერიის ქართველთა მონასტერი X-XVI საუკუნეებში ქართული მეცნიერებისა და კულტურის ცენტრი იყო.

ბათუმის შოთა რუსთაველის სახელმწიფო უნივერსიტეტის ჰუმანიტარულ მეცნიერებათა ფაკულტეტის „არაფორმალური განათლების ცენტრმა“ პროექტის ფარგლებში განაახლა აბიტურიენტთა უფასო მომზადება ზოგადი უნარების (ვერბალური ნაწილი), ისტორიის, ქართული ენისა და ლიტერატურისა მიმართულებით.
ცენტრის წარმომადგენლებმა აბიტურიენტებთან საინფორმაციო შეხვედრა გამართეს და სწავლის პირობები გააცნეს.
მოსამზადებელ ჯგუფებში მეცადინეობებს ატარებენ ჰუმანიტარულ მეცნიერებათა ფაკულტეტის შესაბამისი გამოცდილების მქონე წარმატებული სტუდენტები. მათ კონსულტაციას უწევენ უნივერსიტეტის პროფესორები (ასოც. პროფ. ლალი ანთიძე, ასოც. პროფ. ნანა ცეცხლაძე, ასოც. პროფ. ჯემალ კარალიძე, პროფ. რ. ხალვაში). მეცადინეობების დასრულების შემდეგ ჩატარდება იმიტირებული გამოცდები (2019 წლის ივნისი).
მიმდინარე წელს არაფორმალური განათლების ცენტრი პროექტის - „უნივერსიტეტი-სკოლას“ ფარგლებში 100-მდე აბიტურიენტს ამზადებს.