ბათუმის შოთა რუსთაველის სახელმწიფო უნივერსიტეტის ჰუმანიტარულ მეცნიერებათა ფაკულტეტის სტუდენტებმა სოფიკო თურმანიძემ, მარიამ ხიბაიამ და თეონა კეკელიძემ 21-28 თებერვალს მონაწილეობა მიიღეს ივანე ჯავახიშვილის თბილისის სახელმწიფო უნივერსიტეტში გამართულ „ზამთრის საერთაშორისო ქართველოლოგიურ სკოლა 2019“-ში. სკოლის სამივე მონაწილის ნაშრომი საუკეთესოდ დასახელდა და მარიამ ხიბაიას ქართველოლოგიის მხარდამჭერთა საერთაშორისო ასოციაციამ ცნობილი ქართველოლოგის ჰაინც ფენრიხის სახელობის ფულადი პრემია გადასცა.

ბათუმის შოთა რუსთველის სახელმწიფო უნივერისტეტში საქართველოს რუსეთის მიერ ოკუპაციისა და ძალდატანებითი გასაბჭოების დღისადმი მიძღვნილი ღონისძიებები გაიმართა. სტუდენტებმა და პროფესორ-მასწავლებლებმა 1921 წლის მარტში საქართველოს ერთიანობისათვის დაღუპული გვარდიელების საფლავი ყვავილებით შეამკეს. პროფესორმა ოთარ გოგოლიშვილმა საჯარო ლექცია წაიკითხა თემაზე: „1921 წლის 25 თებერვალი საქართველოში“. ლექციის დასრულების შემდეგ კონფერენცია „აზროვნების განსაბჭოება“ ჩატარდა. სამეცნიერო სესიაზე მონაწილეებმა 1921 წლის 25 თებერვალს განვითარებულ მოვლენებზე დისკუსია გამართეს და ქვეყნის გასაბჭოების პროცესებზე იმსჯელეს.

ბათუმის შოთა რუსთაველის სახელმწიფო უნივერსიტეტი ღრმა მწუხარებას გამოხატავს უბედური შემთხვევის შედეგად გარდაცვლილი ჰუმანიტარულ მეცნიერებათა ფაკულტეტის ინგლისური ფილოლოგიის საგანმანათლებლო პროგრამის მეორე კურსის სტუდენტის თამარ ართმელაძის გარდაცვალების გამო და უსამძიმრებს გარდაცვლილის ოჯახს.

ბათუმის შოთა რუსთაველის სახელმწიფო უნივერსიტეტის ჰუმანიტარულ მეცნიერებათა ფაკულტეტის ისტორიის სპეციალობის IV კურსის სტუდენტების მონაწილეობით აზიისა და აფრიკის ქვეყნების ახალ და უახლეს ისტორიის საკითხებზე ინტელექტუალური შეჯიბრი გაიმართა. სტუდენტებმა სილაბუსით გათვალისწინებული სასწავლო პროგრამა შეაჯამეს და დარგის აქტუალურ საკითხებზე იმსჯელეს. ყოველწლიური ღონისძიება ჰუმანიტარულ მეცნიერებათა ფაკულტეტის პროფესორის, აღმოსავლეთმცოდნეობის დეპარტამენტის ხელმძღვანელის ემზარ მაკარაძის ორგანიზებით ჩატარდა.

მაკედონიის დედაქალაქ სკოპიეში ევროკავშირის პროგრამა „ჰორიზონტი 2020“-ის KEAC-BSR - „ცოდნის გაცვლა და აკადემიური კულტურები ჰუმანიტარულ სფეროში: ევროპა და შავი ზღვის აუზი, XVIII-XXI სს“ ფარგლებში ჩატარდა საერთაშორისო სამეცნიერო კონფერენცია თემაზე: „ცოდნის გაცვლა აკადემიურ კულტურებში მიგრაციის გზით ევროპასა და შავი ზღვის ქვეყნებში და მათ შორის“ (პირველ მსოფლიო ომამდე პერიოდი)“. ერთკვირიან სამეცნიერო სესიაში მონაწილეობა მიიღეს ბსუ-ს რექტორის მოადგილემ თამარ სირაძემ, პროფესორმა მარინე აროშიძემ, ასოცირებულმა პროფესორებმა: ნინო აროშიძემ, თამაზ ფუტკარაძემ, მანუჩარ ლორიამ და დოქტორანტმა ქეთევან ფუტკარაძემ. კონფერენცია მიზნად ისახავდა ისეთი აქტუალური საკითხების განხილვას, როგორიცაა: ბალკანეთი და კავკასია მიგრაციის გზაჯვარედინზე და ცოდნის გაცვლა, გადასახლებული აკადემიური ელიტა ეროვნული საგანმანათლებლო ინსტიტუციების განვითარებისათვის ბრძოლაში, აკადემიური მიგრაცია და სამეცნიერო მიღწევები.