23-29 ოქტომბერს Data Bootcamp-ში მონაწილეობა მიიღეს ბათუმის შოთა რუსთველის სახელმწიფო უნივერსიტეტის კომპიუტერული მეცნიერების ძირითადი და დამატებითი საგანმანათლებლო პროგრამის სტუდენტებმა გურამ დავითაძემ, თინათინ როდინაძემ და არჩილ თავდგირიძემ. პრაქტიკული და თეორიული სწავლება ითვალისწინებდა მონაწილეების ბიზნეს იდეებისა და პროტოტიპების წარდგენას. Data Bootcamp-ის რჩეული გუნდის წევრები გახდნენ ბსუ-ს სტუდენტები გურამ დავითაძე და თინათინ როდინაძე, რომლებიც დაჯილდოვდნენ 1000-ლარიანი ვაუჩერით. წარმატებული სტუდენტები ასევე 5 საუკეთესო მონაწილეთა შორის დასახელდნენ და სტაჟირებას გაივლიან თიბისი ბანკის მონაცემთა მეცნიერების დეპარტამენტში.

კიბერუსაფრთ¬ხოების ცნობიერების ამაღლების თვის ფარგლებში ბსუ-ს ზუსტ მეცნიერებათა და განათლების ფაკულტეტის ინოვაციების ლაბორატორიაში, 25-26 ოქტომბერს კომპიუტერულ მეცნიერებათა დეპარტამენტის ასოცირებულმა პროფესორმა მიხეილ დონაძემ ჩაატარა სამუშაო შეხვედრა თემაზე: „კიბერსივრცე და კიბერუსაფრთხოების გამოწვევები - კიბერმდგრადობა“. ვორქშოპში მონაწილეობა მიიღეს კომპიუტერული მეცნიერების სამაგისტრო საგანმანათლებლო პროგრამის I-II კურსის სტუდენტებმა, რომლებიც დასაქმებული არიან სხვადასხვა კომპანიაში და მათი პროფესიული საქმიანობისთვის მნიშვნელოვანია კიბერუსაფრთხოების საკითხების ცოდნა. ვორქშოპის დასრულების შემდეგ ფაკულტეტის დეკანმა პროფესორმა ლელა თურმანიძემ მონაწილეებს გადასწა სერთიფიკატები.

ბათუმის შოთა რუსთაველის სახელმწიფო უნივერსიტეტის ფიზიკის დეპარტამენტს უნგრული წარმოშობის უკრაინელი მეცნიერი ლასლო ჯენკოვსკი ეწვია. ზუსტ მეცნიერებათა და განათლების ფაკულტეტის დეკანთან, პროფესორ ლელა თურმანიძესთან და პროფესორ-მასწავლებლებთან გამართულ შეხვედრაზე დაიგეგმა 2024 წლის ოქტომბერში, ბათუმში მაღალი ენერგიების ფიზიკისა და ლაზერული ფიზიკის ახალი ტრენდებისადმი მიძღვნილი საერთაშორისო სამეცნიერო კონფერენციის ჩატარება. მხარეთა შეთანხმებით შეიქმნება ლოკალური საორგანიზაციო კომიტეტი, რომელსაც ბსუ-ს ფიზიკის დეპარტამენტი უხელმძღვანელებს.

ბათუმის შოთა რუსთაველის სახელმწიფო უნივესიტეტის ზუსტ მეცნიერებათა და განათლების ფაკულტეტის ასოცირებულმა პროფესორმა მაია ძაძამიამ და ჰუმანიტარულ მეცნიერებათა ფაკულტეტის ასოცირებულმა პროფესორმა ნანა მაზმიშვილმა მონაწილეობა მიიღეს 16-20 ოქტომბერს, ქალაქ სტოკჰოლმში (შვედეთი), სამეფო ტექნოლოგიურ ინსტიტუტში გამართულ ტრენინგში. ინტენსიური, ინტერაქტიული ტრენინგი „უმაღლესი განათლების გაძლიერება“ მოიცავდა თანამედროვე სამუშაო ბაზარზე არსებული მოთხოვნების და უმაღლესი განათლების სისტემის შინაარსისა და სტრუქტურის მისადაგებას ინოვაციური მიდგომების და სწავლება/სწავლის ეფექტიანობის გაზრდის უზრუნველყოფის გათვალისწინებით. სწავლების სტრატეგიული თემები ეხებოდა შედეგზე ორიენტირებული სწავლა-სწავლების მეთოდების მნიშვნელობას, შეფასების მეთოდებს, სწავლების ხარისხის სტრატეგიულ საკითხებს, პროფესორ-მასწავლებლების სამუშაო დატვირთვის გამარტივების გზებს და თანამედროვე ტექნოლოგიების გამოყენებას უმაღლეს საგანმანათლებლო დაწესებულებებში.

ბათუმის შოთ რუსთველის სახელმწიფო უნივერსიტეტში სეზონური სკოლა „კვლევის მეთოდები განათლებაში“ გაიხსნა. სწავლებას ილიას სახელმწიფო უნივერსიტეტის ასოცირებული პროფესორი თამარ ბრეგვაძე და კავკასიის უნივერსიტეტის ასოცირებული პროფესორი სიმონ ჯანაშია უძღვებიან. პროფესორ-მასწავლებლები და სტუდენტები ოთხი დღის განმავლობაში გაეცნობიან ისეთ აქტუალურ საკითხებს, როგორიცაა: კვლევის დიზაინი, თვისებრივი კვლევის მეთოდის მიმოხილვა, საკვლევი კითხვისა და კვლევის ამოცანების განსაზღვრა, კონცეპტუალური ჩარჩოს შემუშავება, მონაცემთა შეგროვების ტექნიკა, მონაცემთა ანალიზი და კვლევის გეგმის შემუშავება.