ბათუმის შოთა რუსთაველის სახელმწიფო უნივერსიტეტის ეკონომიკისა და ბიზნესის ფაკულტეტის პროფესორ-მასწავლებლებმა და სტუდენტებმა მონაწილეობა მიიღეს 29-30 სექტემბერს, ქუთაისის აკაკი წერეთლის სახელმწიფო უნივერსიტეტში გამართულ მეორე საერთაშორისო სამეცნიერო კონფერენციაში „თანამედროვე განვითარების ეკონომიკური, სამართლებრივი და სოციალური პრობლემები - 2017“. მონაწილეებმა ეკონომიკური პოლიტიკისა და ფინანსების აქტუალურ საკითხებზე მოხსენებები და პრეზენტაციები წარმოადგინეს თანამედროვე ეკონომიკის, პოლიტიკის და სოციალურ-დემოგრაფიული პროცესებისა და ბიზნესის ფინანსური უზრუნველყოფისა და მართვის აქტუალური საკითხების სექციებში.

ეკონომიკისა და ბიზნესის ფაკულტეტს საქმიანი ვიზიტით ბელორუსიის სახელმწიფო უნივერსიტეტის ბიზნესის ფაკულტეტის დეკანი პროფესორი გენადი ხაცკევიჩი ეწვია. გაცნობითი ხასიათის შეხვედრა ეკონომიკისა და ბიზნესის ფაკულტეტის დეკანთან, პროფესორ ვლადიმერ ღლონტთან გაიმართა. ვიზიტი მიზნად ისახავდა უმაღლეს სასწავლებლებს შორის სამომავლო და სტრატეგიული ურთიერთობების გაღრმავებას, ერთობლივი ტრენინგ-კურსების ჩატარებას, სტუდენტთა და პროფესორ-მასწავლებელთა გაცვლითი პროგრამების განხორციელებასა და გამოცდილების გაზიარებას.

ბათუმის შოთა რუსთაველის სახელმწიფო უნივერსიტეტის, ეკონომიკისა და ბიზნესის ფაკულტეტის ადმინისტრაცია (დეკანატი, ხარისხის უზრუნველყოფის სამსახური, დარგობრივი დეპარტამენტის ხელმძღვანელები) და აკადემიური პერსონალი ფაკულტეტის პირველკურსელებს შეხვდნენ. მათ სტუდენტებს უმაღლესი საგანმანათლებლო დაწესებულების ძირითადი მარეგულირებელი აქტები, საგანმანათლებლო პროგრამების განხორციელებისა და სტუდენტთა აკადემიური შეფასებების წესები, სტრუქტურა და მიმდინარე პროექტები გააცნეს. 2017-2018 სასწავლო წელს ბათუმის შოთა რუსთაველის სახელმწიფო უნივერსიტეტის ეკონომიკისა და ბიზნესის ფაკულტეტზე 210 პირველკურსელი და 35 მობილობით გადმოსული სტუდენტი ჩაირიცხა.

დღეს, I საერთაშორისო საზაფხულო სამეცნიერო-პრაქტიკული სკოლა „საქართველო-ისრაელის ურთიერთობები: ახალი ტექნოლოგიების მართვა ურბანულ და აგრარულ სექტორებში“ გაიხსნა. საზაფხულო სკოლა ივანე ჯავახიშვილის სახელობის თბილისის სახელმწიფო უნივერსიტეტის, ბათუმის შოთა რუსთაველის სახელობის სახელმწიფო უნივერსიტეტის, საქართველოში ისრაელის საელჩოსა და ისრაელის ფირმა „ნატაფიმ-საქართველოს“ ორგანიზებით ტარდება.

ეკონომიკისა და ბიზნესის ფაკულტეტის პროფესორ-მასწავლებლებისა და სხვადასხვა ორგანიზაციის წარმომადგენლების მორიგი შეხვედრა გაიმართა ბათუმის შოთა რუსთაველის სახელმწიფო უნივერსიტეტში. ფაკულტეტის აკადემიურმა პერსონალმა კურსდამთავრებულ დამსაქმებლებს მოქმედი საგანმანათლებლო პროგრამები, ახალი საბაკალავრო პროგრამის მოთხოვნები, დარგობრივი მახასიათებლები, სტრუქტურა და სასწავლო კურსების განვითარების დინამიკა გააცნო. მხარეებმა შეხვედრაზე ასევე შეაფასეს პროგრამების მიზნები, ამოცანები და სწავლის შედეგების პრაქტიკასთან დაახლოების ხელშემწყობი რეკომენდაციები წარმოადგინეს. შეხვედრას ესწრებოდნენ უნივერსიტეტის რექტორის მოადგილე სამეცნიერო დარგში ნათია წიკლაშვილი, ხარისხის უზრუნველყოფის სამსახურის უფროსი ანზორ ბერიძე და 30-მდე სხვადასხვა საჯარო და კერძო დაწესებულების წარმომადგენლები.