ბსუ-ს პროფესორებმა მონაწილეობა მიიღეს 8-15 სექტემბერს, ვარნის თავისუფალ უნივერსიტეტში გამართულ III საერთაშორისო სამეცნიერო-პრაქტიკული ფორუმში „ინოვაციები მეცნიერებაში: თანამედროვეობის გამოწვევები“. პროფესორებმა ნათია წიკლაშვილმა, ასიე ცინცაძემ, ანზორ დევაძემ, ასოცირებულმა პროფესორებმა ბადრი გეჩბაიამ, გულიკო და დათო ქათამაძეებმა, ირმა ჩხაიძემ, პაატა ჩაგანავამ, ია მესხიძემ, ნანი გვარიშვილმა, ასისტენტ პროფესორებმა ლილით მელოიანმა, ნატო ჯაბნიძემ, ნატალია რობიტაშვილმა, ირინა თავაძემ, ნარგიზ ფალავანდიშვილმა, ირინა ვაშაყმაძემ, ლეილა ცეცხლაძემ, დოქტორმა ნუგზარ ზოსიძემ მოხსენებები წარმოადგინეს დარგის აქტუალურ საკითხებზე. ფორუმის ფარგლებში შედგა საქმიანი შეხვედრები ქ. ვარნას მუნიციპალიტეტის მერიის უმაღლესი განათლების განყოფილების, ვარნის თავისუფალი უნივერსიტეტის ადმინისტრაციის წარმომადგენლებთან და მოეწყო მრგვალი მაგიდა ბულგარეთის საგანმანათლებლო სისტემის შესახებ.

ბათუმის შოთა რუსთაველის სახელმწიფო უნივერსიტეტის მიზნობრივი სამეცნიერო-კვლევითი პროექტის „აჭარის ავტონომიური რესპუბლიკის სოციალურ-ეკონომიკური განვითარების სისტემური ტენდენციები: სტარტეგია, ინსტრუმენტარი, ეფექტიანობა“ ფარგლებში, პროფესორმა ვლადიმერ ღლონტმა მონაწილეობა მიიღო სამეცნიერო სემინარში თემაზე: „ეკონომიკური თეორიისა და პოლიტიკის განვითარება“. ღონისძიება 9-10 ივლისს ბუქარესტის ეკონომიკური კვლევების უნივერსიტეტში ჩატარდა და მიზნად ისახავდა ევროპული რეგიონალიზმის თეორიისა და პრაქტიკის აქტუალური საკითხების შესწავლას. პროფესორმა ვლადიმერ ღლონტმა სემინარზე სასტენდო მოხსენება: „რეგიონული სოციალურ-ეკონომიკური სისტემის ფუნქციონირების შეფასება“ წარადგინა.

ბსუ-ს ეკონიმიკისა და ბიზნესის ფაკულტეტის სტუდენტმა (ეკონომიკა, III კურსი) ნანი ჯიჯავაძემ 14-28 ივნისს საფრანგეთში, ქალაქ პუატიეს უნივერსიტეტის მიერ ორგანიზებულ საერთაშორისო სემინარში მიიღო მონაწილეობა. ორკვირიანი პროგრამა ითვალისწინებდა სწავლების ინოვაციური და დისტანციური მეთოდების გაცნობას. სტუდენტები დაესწრნენ 60-საათიან ლექციათა კურსს ფრანგულ ენაში და მონაწილეობა მიიღეს კულტურულ ღონისძიებებში. ყოველწლიური საზაფხულო სკოლა მიზნად ისახავს უცხოური გამოცდილების გაზიარებასა და ინტერნაციონალიზაციის ხელშეწყობას.

ვროცლავის საუნივერსიტეტო უმაღლესი საბანკო სკოლის პროფესორი ჯოანა ნოგიჩი ერაზმუს+-ის გაცვლითი პროგრამის ფარგლებში ბათუმის შოთა რუსთველის სახელმწიფო უნივერსიტეტს ეწვია. რექტორის მოადგილეებთან ნათია წიკლაშვილთან, თამარ სირაძესთან და ეკონომიკისა და ბიზნესის აკადემიურ პერსონალთან გამართულ შეხვედრაზე სტუმარმა საგანმანათლებლო პროგრამები წარმოადგინა. პროფესორმა ჯოანა ნოგიჩიმ ქართველ კოლეგებს ასევე საკუთარი გამოცდილება გააცნო და ეკონომიკის აქტუალურ საკითხებზე ისაუბრა. ღონისძიება ბსუ-ს სტრატეგიული განვითარებისა და საგარეო ურთიერთობათა დეპარტამენტის ორგანიზებით გაიმართა.

19-20 ივნისს ბათუმის შოთა რუსთაველის სახელმწიფო უნივერსიტეტის ეკონომიკისა და ბიზნესის ფაკულტეტის სტუდენტები ასისტენტ პროფესორ რამინ ცინარიძის ორგანიზებით ფინანსთა სამინისტროს შემოსავლების სამსახურის შემეცნებით-საგანმანათლებლო პროექტის ფარგლებში საბაჟო გამშვებ პუნქტს „სარფი,“ გაფორმების ეკონომიკურ ზონას -„ბათუმი" (ადლია) და შემოსავლების სამსახურის ბათუმის სერვის-ცენტრს ეწვივნენ. სტუდენტები (ფინანსები III კურსი, IV კურსი - დამატებითი სპეციალობა და საბუღალტრო-საგადასახადო საქმე II კურსი) გაეცნენ საბაჟო საზღვრის კვეთის პროცედურებს, ფიზიკური პირის, საქონლისა და სატრანსპორტო საშუალებათა დათვალიერებას (სკანირებას), მათ იდენტიფიკაციას, ვეტერინალური, ფიტო-სანიტარიული და სანიტარული კონტროლის პროცედურებს, სამოსამსახურეო დანიშნულების ძაღლებით ნარკოტიკების აღმოჩენის შემთხვევებსა თუ დეკლარაციების შევსების წესს.