ბათუმის შოთა რუსთაველის სახელმწიფო უნივერსიტეტში 2018 წლის იანვრიდან სტუდენტური სერვისების ახალი პორტალი - portal.bsu.edu.ge ამოქმედდება. კარიერული განვითარების, კულტურისა და სპორტის სამსახურის უფროსმა მერაბ დიასამიძემ ჰუმანიტარულ მეცნიერებათა ფაკულტეტის სტუდენტებს სიახლე გააცნო. ინოვაციური სერვისი სტუდენტებს შესაძლებლობას მისცემს, ოპერატიულად მიიღონ ინფორმაცია არსებულ სტუდენტურ პროექტებზე, დასაქმებაზე, სტაჟირებაზე, ტრენინგებზე, სემინარებზე, კონფერენციებზე, სოციალურ პროგრამებსა და კულტურულ-სპორტულ აქტივობებზე. სტუდენტური პორტალის საშუალებით შეიქმნება ბსუ-ს სტუდენტთა, კურსდამთავრებულთა და დამსაქმებელთა ბაზა, რომლის საშუალებით დამსაქმებელი მოკლე ვადაში დაუკავშირდება დასაქმების მსურველს და გაიზრდება დასაქმების შესაძლებლობები.

კონკურსის „ეფექტიანი ცვლილებების სესიები“ დასკვნით ეტაპზე ოთხი წარდგენილი სტუდენტური პროექტიდან ორი გამარჯვებული გუნდი გამოვლინდა, რომელსაც ფინანსურ მხარდაჭერას კავკასიის გარემოსდაცვითი არასამთავრობო ორგანიზაციების ქსელი (CENN) გაუწევს. კონკურსი (WMTR II) პროგრამის ეგიდით ჩატარდა, რომელიც ორ ეტაპს მოიცავდა, პირველი ეტაპის ფარგლებში ღონისძიება უკვე ჩატარდა 9-10 ნოემბერს, რომლის ფარგლებშიც სტუდენტებს ჩაუტარდათ სემინარები და ტრენინგები ნარჩენების მართვის თემაზე. სემინარების შემდეგ, სტუდენტებმა სამუშაო ჯგუფებში მენტორების დახმარებით შეიმუშავეს კონკრეტული პროექტები ნარჩენების მართვის საკითხებზე.

ფაზა II (WMTR II), რომელსაც ფინანსურ მხარდაჭერას უწევს აშშ-ის საერთაშორისო განვითარების სააგენტო (USAID) და ახორციელებს კავკასიის გარემოსდაცვითი არასამთავრობო ორგანიზაციების ქსელი (CENN) საქართველოს სამ რეგიონში - აჭარის ავტონომიური რესპუბლიკა, კახეთი და შიდა ქართლი ხორციელდება.

ბათუმის შოთა რუსთაველის სახელმწიფო უნივერსიტეტში ლევან ბერძენიშვილის საჯარო ლექცია ჩატარდა თემაზე: “სამი გრანდიოზული პოემა“. მომხსენებელმა ახლებურ ფორმატში წარადგინა ნიზამი განჯელის - „ლეილი და მაჯნუნი,“ შოთა რუსთაველის - „ვეფხისტყაოსანი“ და დანტე ალიგიერის - „ღვთაებრივი კომედია“. შეხვედრა კომპანია ჯეოსელის ორგანიზებით სტუდენტური პროექტის „ვიცი“ ფარგლებში ჩატარდა. 12 ოქტომბრიდან, ყველა „ვიციში“ ჩართულ უნივერსიტეტში, საინტერესო ადამიანების, ამბებისა და წიგნების მოგზაურობა დაიწყო, რომლის მსმენელი და აქტიური მონაწილე „ვიციში“ ჩართულ ყველა სტუდენტს შეუძლია გახდეს.

დემოკრატიული ჩართულობის ცენტრების პროექტის „ადამიანის უფლებების საკითხებზე ინფორმაციის გაცვლის პროცესის გაუმჯობესება ცენტრსა და რეგიონებს შორის“ ფარგლებში ბათუმის შოთა რუსთაველის სახელმწიფო უნივერსიტეტში სემინარი ჩატარდა ადამიანის უფლებათა დაცვის საკითხებზე. სტუდენტებს უფლებების დაცვის სამდივნოს უფროსი ნატალია ჯალიაშვილი და ამავე სამდივნოს მრჩეველი თორნიკე დვალი სოციალური და სამოქალაქო-პოლიტიკური უფლებების ურთიერთდამოკიდებულებასა და მათი განუყოფლობის საკითხებზე ესაუბრენ. ყურადღება გაამახვილეს ასევე საქართველოს ევროინტეგრაციის პროცესის კონტექსტში სახელმწიფოს მზარდ სოციალურ პასუხისმგებლობაზე და სოციალური უფლებების რეალიზების მნიშვნელობაზე სამოქალაქო-პოლიტიკური უფლებების გათვალისწინებით.

არასამთავრობო ორგანიზაციის „ხელმისაწვდომი გარემო ყველასათვის“ აღმასრულებელმა დირექტორმა გიორგი ახმეტელმა ბათუმის შოთა რუსთაველის სახელმწიფო უნივერსიტეტში საჯარო ლექცია წაიკითხა თემაზე: „საქართველოში შშმ პირთა უფლებრივი მდგომარეობა“. მომხსენებელმა სტუდენტებს საქართველოში შშმ პირთა უფლებრივი მდგომარეობა გააცნო და ისაუბრა სამედიცინო და სოციალურ მიდგომებს შორის არსებულ განსხვავებაზე. გიორგი ახმეტელმა მსმენელებს გაუზიარა ამერიკის შეერთებულ შტატებში, მაკკეინის ინსტიტუტში მიღებული გამოცდილება. ორგანიზაცია „ხელმისაწვდომი გარემო ყველასათვის“ შშმ პირთა მოძრაობას წარმოადგენს და 2010 წლიდან შეზღუდული შესაძლებლობების მქონე პირების უფლებრივი მდგომარეობის გაუმჯობესებაზე მუშაობს.