2018 წლის 11-20 აგვისტოს დაუგავპილსის უნივერსიტეტში (ლატვია) ჩატარდება საზაფხულო სკოლა თემაზე „შეიგრძენი ლატვია“. საზაფხულო სკოლაში მონაწილეობა შეუძლიათ ბაკალავრის, მაგისტრატურის, დოქტორანტურის სტუდენტებს და აკადემიურ და სამეცნიერო პერსონალს. სტიპენდია ფარავს ცხოვრების, სამუშაო შეხვედრების, სასწავლო ტურებისა და კულტურული ღონისძიებების ხარჯებს.

ბათუმის შოთა რუსთველის სახელმწიფო უნივერსიტეტში ინტელექტუალური ვიქტორინის „ბსუ-ს ინტელექტუალი“ გაცნობითი ხასიათის თამაში გაიმართა. ვიქტორინაში სხვადასხვა ფაკულტეტის სტუდენტებისაგან დაკომპლექტებული 27 გუნდი მონაწილეობდა. შეჯიბრი თვეში ორჯერ გაიმართება და სემესტრის ბოლოს გამარჯვებულ სამ საუკეთესო გუნდს სამახსოვრო საჩუქრები გადაეცემა. „ბსუ-ს ინტელექტუალი“ უნივერსიტეტის სტუდენტთა კარიერული განვითარების, კულტურისა და სპორტის დეპარტამენტის ორგანიზებით ტარდება.

აჭარის ა.რ. ტურიზმისა და კურორტების დეპარტამენტმა ბსუ-ში გაცვლითი პროგრამებით მყოფ ესპანელ, რუმინელ, თურქ, ყაზახ და აზერბაიჯანელ სტუდენტებს უმასპინძლა. დეპარტამენტის თავმჯდომარის მოადგილემ თამარ კაიკაციშვილმა, დეპარტამენტის საზოგადოებასთან ურთიერთობისა და რეკლამის განყოფილების უფროსმა ნინო ხახუბიამ სტუდენტებს დეპარტამენტის საქმიანობა გააცნეს და რეგიონის ტურისტული შესაძლებლობები წარუდგინეს. ღონისძიების დასასრულს, სტუდენტებს საინფორმაციო-სასაჩუქრე პაკეტები გადაეცათ. შეხვედრა ბსუ-ს სტრატეგიული განვითარებისა და საგარეო ურთიერთობათა დეპარტამენტის ინიციატივით გაიმართა.

ტურიზმის ფაკულტეტის მოწვეულმა სპეციალისტმა ნინო დევაძემ ერასმუს+ პროგრამის ფარგლებში ბოლონიის უნივერსიტეტში „საერთაშორისო ტურიზმის და დასვენების ინდუსტრიის“ (ITALI) საგანმანათლებლო პროგრამის სასემინარო კომპონენტში ლექციები ჩაატარა. ნინო დევაძემ სტუდენტებს ტურიზმის მდგრადი განვითარებისა და ტურიზმის სტატისტიკის საკითხები გააცნო. „საერთაშორისო ტურიზმის და დასვენების ინდუსტრიის“ 3-კრედიტიანი სასემინარო კომპონენტი 26 თებერვლიდან 10 მარტამდე ბოლონიის უნივერსიტეტის საერთაშორისო ინგლისურენოვანი საბაკალავრო პროგრამის სტუდენტებმა გაიარეს.

2018 წლის 24-28 სექტემბერს ბელარუსიაში, ქალაქ მინსკში გაიმართება რიგით მე-12, ყოველწლიური კონკურსი სამართალში, სახელწოდებით - „ახალგაზრდები მშვიდობისათვის“. მონაწილე ჯგუფი უნდა შედგებოდეს 2-3 სტუდენტისაგან, რომელთა ასაკიც არ აღემატება 35 წელს. აპლიკაციის შევსების ბოლო ვადა - 2018 წლის 30 ივნისი

ფრანგული საერთაშორისო ორგანიზაცია CIFE (Centre International de Formation Européenne) იწვევს სტუდენტებსა (მინიმუმ 2 წლიანი სტუდენტური გამოცდილებით) და ახალგაზრდა პროფესიონალებს 6 სხვადასხვა საზაფხულო უნივერსიტეტში მონაწილეობის მისაღებად.

ვიშეგრადის ფონდი 2018 წლის 1-14 ივლისს პოლონეთის ქალაქ კრაკოვში იწვევს სტუდენტებს, კურსდამთავრებულებს, დოქტორანტ-მკვლევარებს, ახალგაზრდა პროფესიონალებსა და ლიდერებს საზაფხულო სკოლაში მონაწილეობის მისაღებად.

გაზაფხულის სემესტრში, ბათუმის შოთა რუსთველის სახელმწიფო უნივერსიტეტში გაცვლითი პროგრამების ფარგლებში 12 უცხოელი სტუდენტი ისწავლის. 2 ესპანელი (ესპანეთის ალკალას უნივერსიტეტი), 1 რუმინელი (სუჩაევას უნივერსიტეტი), 3 თურქი (თურქეთის სხვადასხვა უნივერსიტეტი), 2 ყაზახი (ყაზგუს უნივერსიტეტი) და 4 აზერბაიჯანელი (ნახჭევანის უნივერსიტეტი) ახალგაზრდა ჰუმანიტარულ მეცნიერებათა, სოციალურ და პოლიტიკურ მეცნიერებათა და ტურიზმის ფაკულტეტების საგანმანათლებლო პროგრამებზე მიიღებს განათლებას. ბსუ-ს რექტორის მოადგილე თამარ სირაძე, სტრატეგიული განვითარებისა და საერთაშორისო ურთიერთობათა დეპარტამენტის თავმჯდომარე გიორგი თავამაიშვილი ნახჭევანის უნივერსიტეტის პრორექტორთან ელშენ მამედოვთან ერთად, უცხოელ სტუდენტებს შეხვდნენ და წარმატებები უსურვეს.