ახალი ამბები

საქართველოს პრეზიდენტი მიხეილ სააკაშვილი ბათუმის შოთა რუსთაველის სახელმწიფო უნივერსიტეტის წარჩინებულ სტუდენტებს შეხვდა. ქვეყნის პირველი პირი ახალგაზრდებს დაგეგმილი და მიმდინარე პროექტების შესახებ ესაუბრა. სტუდენტებს ის ინიციატივებიც გააცნო, რომლებიც უკეთესად სწავლის მეტ შესაძლებლობას და სტიმულს მისცემს. ამოქმედდება ქართული სტუდენტური ბარათები, რომლის მეშვეობითაც ისინი ფასდაკლებით ისარგებლებენ, როგორც სავაჭრო ცენტრებში, ისე მგზავრობისას. სტუდენტებისთვის დაზღვევის სპეციალური პაკეტები შემუშავდება, განხორციელდება საზაფხულო დასაქმებისა და სახელმწიფო გრანტის გაუმჯობესების პროგრამა. პრეზიდენტმა სტუდენტებს ინფრასტრუქტურული და საგანმანათლებლო პროექტებიც წარუდგინა, რომლებიც ხორციელდება როგორც ბათუმში, ისე მთელს ქვეყანაში.

სტუდენტური თვიმმართველობისა და სოციალურ მეცნიერებათა, ბიზნესისა და სამართალმცოდნეობის ფაკულტეტის ორგანიზებით ბათუმის რეგიონალური სამეცნიერო კონფერენცია „ეროვნული უსაფრთხოების თანამედროვე გამოწვევები და ტენდენციები“ ჩატარდა. ბათუმის შოთა რუსთაველის სახელმწიფო უნივერსიტეტის პროფესორ-მასწავლებლების, სტუდენტების და ინფორმაციული უსაფრთხოების კვლევებისა და ანალიზის ცენტრის წარმომადგენლებმა მოხსენებები სახელმწიფო ეროვნული უსაფრთხოების საკითხებზე წარმოადგინეს. კონფერენციაზე ისეთი მნიშვნელოვანი თემები განიხილეს, როგორიცაა: უსაფრთხოება და თანამედროვე გამოწვევები, ეროვნული უსაფრთხოება, კიბერუსაფრთხოება ეროვნულ უსაფრთხოებასთან მიმართებაში და ყოველდღიურ ცხოვრებაში. სამეცნიერო სესიის ფარგლებში მრგვალი მაგიდა მოეწყობა.

ბათუმის ღვთისმშობლის შობის სახელობის საკათედრო ტაძრის ეზოში ზურაბ გორგილაძის 75 წლის იუბილესადმი მიძღვნილი „პოეზიის საათი“ გაიმართა. განათლებისა და მეცნიერებათა ფაკულტეტის დაწყებითი განათლების სპეციალობის სტუდენტებმა პოეტის ლექსები წაიკითხეს და პატივი მიაგეს მის ხსოვნას. პროფესორ-მასწავლებლებმა, მწერლებმა, ოჯახის წევრებმა და საზოგადოების წარმომადგენლებმა კიდევ ერთელ გაიხსენეს შემოქმედის ცხოვრება და მოღვაწეობა. „პოეზიის საათი“ ზურაბ გორგილაძის განსასვენებელთან ყოველ წელს პედაგოგიკის მეცნიერებათა დეპარტამენტის ორგანიზებითა და პროფესორ იური ბიბილეიშვილის ინიციატივით ტარდება.

ლიტვის რესპუბლიკის პრემიერ-მინისტრი ანდრიუს კუბილიუსი დელეგაციის წევრებთან და საქართველოს ვიცე-პრემიერ გია ბარამიძესთან ერთად, ბათუმის შოთა რუსთაველის სახელმწიფო უნივერსიტეტს ეწვია. სტუმარმა სტუდენტებისა და პროფესორ-მასწავლებლებისათვის საჯარო ლექცია წაიკითხა თემაზე: „ევროპა კრიზისის შემდეგ: გაკვეთილები ნასწავლი და გაკვეთილები უგულებელყოფილი“. ისაუბრა 2010 წლის მსოფლიო ეკონომიკურ კრიზისზე, მის გამომწვევ მიზეზებზე, ისტორიაზე, თანმდევ პროცესებსა და თანამედროვე გამომწვევებზე. ყურადღება გაამახვილა ასევე ლიტვის, საქართველოსა და ევროპის სხვადასხვა ქვეყნის განვითარების დინამიკაზე. უნივერსიტეტის რექტორმა, პროფესორმა ალიოშა ბაკურიძემ ლიტვის რესპუბლიკის პრემიერ-მინისტრს სამახსოვრო საჩუქარი გადასცა.

ხარკოვის (უკრაინა) ნაციონალური ფარმაცევტული უნივერსიტეტის რექტორი, პროფესორი ვალენტინ ჩერნიხი ბათუმის შოთა რუსთაველის სახელმწიფო უნივერსიტეტის რექტორს, პროფესორ ალიოშა ბაკურიძეს შეხვდა. შეთანხმებისამებრ, ხელი მოეწერება თანამშრომლობის მემორანდუმს, რომელიც ითვალისწინებს სტუდენტთა და პროფესორ-მასწავლებელთა გაცვლითი პროგრამებისა და სამეცნიერო პროექტების განხორციელებას. ყოველწლიურად ფარმაციის, საინჟინრო, ეკონომიკური და ბიოტექნოლოგიების მიმართულების 10 სტუდენტი ხარკოვის ნაციონალურ ფარმაცევტულ უნივერსიტეტში ერთწლიან სასწავლო კურს გაივლის.