ახალი ამბები

სოციალურ მეცნიერებათა, ბიზნესისა და სამართალმცოდნეობის ფაკულტეტის სტუდენტებს ამერიკის წამყვანი უნივერსიტეტების პროფესორები ეკონომიკის აქტუალურ საკითხებზე ლექციებს უკითხავენ. ტეხასის უნივერსიტეტის პროფესორმა დანიელ დანიმ ბიზნესის დაგეგმვას, სტრუქტურას, განვითარებას, საერთაშორისო ბიზნესის პრინციპებს, მენეჯმენტის თანამედროვე მეთოდებსა და მოდულებს ათდღიანი სალექციო კურსი მიუძღვნა. მინესოტის უნივერსიტეტის პროფესორმა ჯეიმს რედელშეირმა სტუდენტებს ვრცლად წარუდგინა უმუშევრობის, ეკონომიკური და ფინანსური კრიზისების ინფლაციის გამომწვევი მიზეზები და თანამედროვე პრობლემები. ამერიკელმა ექსპერტმა ასევე ისაუბრა ამ პროცესების პრევენციისა და აღმოფხვრის აპრობირებულ ღონისძიებებზე. კოლორადოს უნივერსიტეტის პროფესორმა ჯონ ბროკიმ ეკონომიკური ზრდის, მოსახლეობის შემოსავლის ამაღლების თანამედროვე საკითხები განიხილა. ყურადღება გაამახვილა განვითარებული და განვითარებადი ქვეყნების ეკონომიკური შესაძლებლობებისა და რესურსების გამოყენების თანამედროვე მიმართულებებზე.

ამერიკელმა პროფესორებმა რიჩარდ ლეტენდრემ და რობერტ ლოუდერმა ბათუმის შოთა რუსთაველის სახელმწიფო უნივერსიტეტის სტუდენტებისათვის საინჟინრო ტექნოლოგიების მიმართულებით ორკვირიანი სალექციო კურსი წაიკითხეს. პროფესორმა რიჩარდ ლეტენდრემ მომავალ ინჟინრებს მშენებლობის დაპროექტების საფუძვლები და ის ძირითადი პრინციპები გააცნო, რომლებიც ერთმანეთთან აკავშირებს ბიზნესმენს (მეპატრონეს), დამპროექტებლებს, მშენებელთა გუნდსა და ეკონომიკის სამინისტროს. უცხოელმა ექსპერტმა ასევე განიხილა საერთაშორისო სამშენებლო კოდები, შენობა–ნაგებობათა კლასიფიკაცია და სხვა მნიშვნელოვანი საკითხები. პროფესორმა რობერტ ლოუდერმა სტუდენტებს ამერიკის თანამედროვე სამრეწველო ენერგეტიკაში გამოყენებული წყლისა და აირის - გათბობისა და კონდიცირების სისტემები წარუდგინა. ისაუბრა წყლის გაწმენდის მეთოდებზე, ძველი და თანამედროვე სატუმბ სისტემებზე, მის მრუდებსა და შერჩევის პრინციპებზე.

ბათუმის შოთა რუსთაველის სახელმწიფო უნივერსიტეტში II საერთაშორისო-სამეცნიერო კონფერენცია ,,კომპიუტინგი/ინფორმატიკა, განათლების მეცნიერებები, მასწავლებლის განათლება“ გაიხსნა. 150-მდე მეცნიერი სამი დღის განმავლობაში კომპიუტინგის, ინფორმატიკის, განათლების მეცნიერებებისა და მასწავლებლის განათლების დღევანდელ მდგომარეობასა და სამომავლო პერსპექტივებზე იმსჯელებს. კონფერენციის მიზანია მეცნიერებს შორის დისკუსიის გამართვა და საქართველოსა და საზღვარგარეთ მიმდინარე სამეცნიერო კვლევების გაცნობა. სესიაზე წარმოდგენილი სხვადასხვა დარგის გაერთიანება ითვალისწინებს ინტერდისციპლინარული მიმართულების განვითარებას, ერთ სფეროში მიღებული შედეგების სხვა მიმართულებაში გამოყენებას, ასევე ინფორმატიკაში შემუშავებული მეთოდებისა და მოდელების განათლების მეცნიერებაში დანერგვას.

შოთა რუსთაველის დარბაზში პროექტის „დიგიტალიზებული პარალელური პოლიტოლოგიის კორპუსი“ ფაგლებში მრგვალი მაგიდა გაიმართა. რსუ-სა და ფრანკფურტის უნივერსიტეტის მკვლევრებმა ერთობლივი სამეცნიერო მუშაობის შედეგები შეაჯამეს და მომავალი კვლევითი მიმართულებების პრიორიტეტებზე იმსჯელეს. ბათუმის შოთა რუსთაველის სახელმწიფო უნივერსიტეტის, ფრანკფურტის გოეთეს უნივერსიტეტის, აშშ-ს კოლუმბიის უნივერსიტეტის მეცნიერთა საინიციატივო ჯგუფმა პირველი ერთობლივი საერთაშორისო პროექტი განახორციელა და პარალელური კორპუსის ელექტრონული დამუშავების შედეგად შექმნა ელექტრონული პოლიტიკური ტერმინების ლექსიკონი ქართულ ენაზე. პროექტის ფარგლებში ტრენინგები ჩატარდა ისეთ საკითხებზე, როგორიცაა ,,ენის კორპუსი და მისი მნიშვნელობა სამეცნიერო და სასწავლო-მეთოდური ინოვაციების დანერგვის მიზნით”, ,,დიგიტალიზებულ თარგმნილ კორპუსზე მუშაობის სპეციფიკა, გამოყენების სფეროები” და „სამომხმარებლო პროგრამული უზრუნველყოფის ინტერფეისთან მუშაობა”.

ტალინის უნივერსიტეტის რექტორი, პროფესორი ტიიტ ლანდი, პროფესორები მაარიკა მილი და რეინ მიულერსონი მორიგი ვიზიტით რსუ-ს ეწვივნენ და პროექტის „ელექტრონული სწავლების დანერგვა, სწავლების პროცესის ხარისხის გაზრდა და პროფესორ-მასწავლებელთა კვალიფიკაციის ამაღლება თბილისისა და ბათუმის სახელმწიფო უნივერსიტეტებში“ შედეგები შეაფასეს. პროექტი მიზნად ისახავდა რსუ-ში ელექტრონული პორტალისა და ელექტრონული სწავლების დანერგვას, ოპერატიული სისტემა Moodle-ის დაფუძნებას, სხვადასხვა სპეციალობის 6 ელექტრონული სასწავლო კურსის შექმნასა და პროფესორ-მასწავლებლებისათვის ელექტრონული სწავლების უნარ-ჩვევების გამომუშავებას. საინფორმაციო ტექნოლოგიებისა და კომუნიკაციების სამსახურის თანამშრომლებმა ესტონელ ინსტრუქტორ ვერონიკა როგალევიჩთან ერთად მოამზადეს ვიდეო და ბეჭდური მეთოდური მითითებანი პროგრამა Moodle-ში მუშაობის დასაწყებად. ელექტრონული სწავლების პორტალით სარგებლობა უნივერსიტეტის ყველა თანამშრომელსა და სტუდენტს შეეძლება. ვიზიტის ფარგლებში ტალინის უნივერსიტეტის პროფესორმა რეინ მიულერსონმა ლექცია წაიკითხა თემაზე: „პოლიტიკური რეჟიმების ცვლა თანამედროვე საერთაშორისო სამართლის ფონზე“.