ახალი ამბები

ბათუმის შოთა რუსთაველის სახელმწიფო უნივერსიტეტის სტუდენტები კიდევ ერთხელ ჩაერთნენ აქციაში - "გაიღე სისხლი სიცოცხლის გადასარჩენად". ღონისძიება სისხლის მარაგის შესაქმნელად გაიმართა და ახალგაზრდების მიერ გაღებული სისხლი სიმსივნით დაავადებულ პაციენტებს მოხმარდება. დონორობის მსურველებს დონაციის შემდეგ სისხლის გაუხლდებათ და უფასოდ ჩაუტარდებათ ძვირადღირებული გამოკვლევები. აქცია რამდენიმე დღეა მიმდინარეობს და მას სხვადასხვა დაწესებულების თანამშრომლებიც შეუერთდებიან.

საქართველოს დამსახურებული არსტისტი ლეო ანთაძე ბათუმის შოთა რუსთაველის სახელმწიფო უნივერსიტეტის სტუდენტებისა და პროფესორ-მასწავლებლებისათვის შეხვდა. ცნობილმა მსახიობმა უმაღლესი საგანმანათლებლო დაწესებულების სააქტო დარბაზში გამართულ შემოქმედებით შეხვედრაზე ეპიზოდები წარმოადგინა ცნობილი სპექტაკლებიდან. საქართველოს სახალხო არტისტისტმა ქვიშხეთში გატარებული წლები მაყურებელს საავტორი მონოსპექტაკლით შესთავაზა. ლეო ანთაძეს 1961 წლიდან საქართველოს დამსახურებული არტისტი, ხოლო 1979 წლიდან საქართველოს სახალხო არტისტია. პირველი წარმატება მსახიობს ახალგაზრდა ვეტერინარის როლმა მოუტანა კინოფილმში „ყვავილი თოვლზე". მის სახელს უკავშირდება მრავალი როლი როგორც კინოში, ასევე თეატრში: „გრაალის მცველნი“ - მზისავარი, „ეზოში ავი ძაღლია“ - ვანო ლაითაძე, „ეუხენა ბალბოა“ - მოხუცი, „ზაფხულის ღამის სიზმარი" - კომშა, „ზვავი“ - ბაბუა, „მე, ბებია, ილიკო და ილარიონი“ - ზურიკო, „ურიელ აკოსტა“ - ბენ-აკიბა, „ქაქუცა ჩოლოყაშვილი“ - თავადი ვაჩნაძე, „ხეები ზეზეურად კვდებიან“ - თვალთმაქცი; „მარიონეტების თეატრში“, „კახაბერის ხმალი“ - ლიპარიტი და სხვა.

საქართველოს სოფლის მეურნეობის მეცნიერებათა აკადემიის აკადემიკოს მამია გოგოლიშვილის 100 წლის იუბილე ბათუმის შოთა რუსთაველის სახელმწიფო უნივერსიტეტში რამდენიმე ღონისძიებით აღინიშნა. უმაღლეს საგანმანათლებლო დაწესებულებაში ცნობილი მეცნიერისა და საზოგადო მოღვაწის სახელობის აუდიტორია გაიხსნა და საიუბილეო შეხვედრა გაიმართა. უნივერსიტეტის რექტორმა, პროფესორმა ალიოშა ბაკურიძემ, აჭარის უმაღლესი საბჭოს წევრებმა, საქართველოს მეცნიერებათა ეროვნული აკადემიის წევრებმა, კოლეგებმა, საზოგადოების წარმომადგენლებმა და სტუდენტებმა მის ღვაწლსა და მიღწევებზე ისაუბრეს. აკადემიკოსმა მამია გოგოლიშვილმა ნაყოფიერი საზოგადოებრივი და მეცნიერულ-პედაგოგიური გზა განვლო. ცნობილი მეცნიერი ასზე მეტი სამეცნიერო ნაშრომის ავტორია, რომელთაგან ცხრა მონოგრაფიაა.

ბათუმის შოთა რუსთაველის სახელმწიფო უნივერსიტეტს პოლონეთის კატოვიცას უნივერსიტეტთან გაფორმებული მემორანდუმის ეგიდით, სილესიას სამედიცინო ფაკულტეტის დეკანი, პროფესორი იან ზეიდა ეწვია. რექტორთან გამართულ შეხვედრაზე ექსპერტ–ეპიდემიოლოგმა სამომავლო თანამშრომლობის მიმართულებებსა და ერთობლივ სასწავლო-სამეცნიერო პროექტებზე ისაუბრა. ევროპაში რესპირატორული დაავადებათა გავრცელების მკვლევარმა ვიზიტის ფარგლებში სტუდენტებისათვის საჯარო ლექცია ჩაატარა ასთმის დიაგნოსტირების საკითხებზე. მომხსენებელმა ისაუბრა დაავადების სირთულეებსა და რესპირატორული დაავადებების გამომწვევ გარემოებებზე. პროფესორ ზეიდას ხელშეწყობით ბათუმის დედათა და ბავშვთა ალერგოლოგიური ცენტრი სილესიის უნივერსიტეტის ეპიდემიოლოგიურ დეპარტამენტთან ერთად, ახორციელებს რესპირაციულ დაავადებათა შესწავლის პროექტს, რომელიც ითვალისწინებს აჭარის I-VIII კლასის 6000 მოსწავლის რესპირატორული დაავადებისა და ასთმის დიაგნოსტიკას. პროგრამის მიზანია რეგიონში ასთმის დიაგნოსტირების გაუმჯობესება და მისი გაკონტროლება.

ახალი სასწავლო წელი ბათუმის შოთა რუსთაველის სახელმწიფო უნივერსიტეტში საზეიმოდ გაიხსნა. სტუდენტებსა და პროფესორ-მასწავლებლებს სწავლის დაწყება მიულოცა და სიახლეები გააცნო უნივერსიტეტის რექტორმა, პროფესორმა ალიოშა ბაკურიძემ. ახალგაზრდებს ასევე მიესალმნენ და წარმატებები უსურვეს აჭარის ა.რ. უმაღლესი საბჭოს თავმჯდომარემ ავთანდილ ბერიძემ, აჭარის ა.რ. განათლების, კულტურისა და სპორტის მინისტრმა გიორგი თავამაიშვილმა, ქალაქ ბათუმის მერმა გიორგი ერმაკოვმა, დეკანოზმა, მამა ანდრიამ, აჭარის სპორტისა და ახალგაზრდობის საქმეთა დეპარტამენტის უფროსის მოვალეობის შემსრულებელმა დავით მიქელაძემ და პოეტმა ვახტანგ ღლონტმა. საზეიმო გახსნაზე ბოტანიკური ბაღის დირექტორმა თამაზ დარჩიძემ საბუნებისმეტყველო მეცნიერებათა მიმართულების სამ სტუდენტს ორასორმოცდაათლარიანი სტიპენდია, ხოლო კომპანია „მაგთის“ წარმომადგენელმა გიორგი ცივაძემ საუკეთესო პირველკურსელს (საკონკურსო ქულის მიხედვით) ერთწლიანი სტიპენდია გადასცეს. 2014-2015 სასწავლო წელს ბსუ-ში 1049 პირველკურსელი ჩაირიცხა, რომელთაგან სასწავლო გრანტი 71-მა მიიღო. 10 უფასო სახელმწიფო საგანმანათლებლო პროგრამაზე 329 ახალგაზრდა ისწავლის. ამჟამად, უმაღლეს საგანმანათლებლო დაწესებულებაში 6 000-მდე სტუდენტი სწავლობს.