ახალი ამბები

სტუდენტური თვითმმართველობის ორგანიზებით ბათუმის შოთა რუსთაველის სახელმწიფო უნივერსიტეტის მხიარულთა და საზრიანთა გუნდების შიდა ჩემპიონატი გაიმართა. პირველობისათვის უმაღლესი საგანმანათლებლო დაწესებულების ოთხი ფაკულტეტის გუნდი იბრძოდა. ეკონომიკისა და ბიზნესის ფაკულტეტის, ტექნოლოგიური, ტურიზმის და იურიდიული ფაკულტეტების მხიარულმა და საზრიანმა სტუდენტებმა საკუთარი შესაძლებლობები „მისალმების“ ნომინაციაში გამოავლინეს. კომპეტენტური ჟიურის შეფასებით, საუკეთესოდ ეკონომიკისა და ბიზნესის ფაკულტეტის გუნდი დასახელდა, მეორე ადგილზე ჰუმანიტარული ფაკულტეტი გავიდა, ხოლო მესამეზე - ტურიზმის ფაკულტეტი. უნივერსიტეტის რექტორის მოვალეობის შემსრულებელმა მერაბ ხალვაშმა სტუდენტებს გამარჯვება მიულოცა, წარმატებები უსურვა და დადებითად შეაფასა უმაღლესი საგანმანათლებლო დაწესებულების ნაკრებ "პორტო ფრანკოს" მონაწილეობა საქართველოს მან-სან-კან-ის რეგიონალურ ლიგაში. ბსუ-ს გუნდმა 21 ნოემბერს გამართულ ნახევარფინალში გაიმარჯვა და 17 დეკემბერს, ივანე ჯავახიშვილის სახელობის თბილისის სახელმწიფო უნივერსიტეტში დაგეგმილ ფინალურ შეხვედრაში მიიღებს მონაწილეობას.

შშმ პირთა საერთაშორისო დღე ბათუმის შოთა რუსთაველის სახელმწიფო უნივერსიტეტის სოციალურ და პოლიტიკურ მეცნიერებათა ფაკულტეტის სტუდენტებმა და პროფესორ-მასწავლებლებმა ბათუმის #6 საჯარო სკოლის შეზღუდული შესაძლებლობების მქონე მოსწავლეებთან ერთად აღნიშნეს. ზოგადსაგანმანათლებლო დაწესებულების აღსაზრდელები ბსუ-ში არსებული ცეკვის მოყვარულთა წრის გაკვეთილს დაესწრნენ, სწრაფი კვების ობიექტის მუშაობაში ჩაერთნენ, მოსწავლე-ახალგაზრდობის სასახლეში გობელენზე მუშაობის სპეციფიკას გაეცნენ და მხატვრულ კითხვაში მიიღეს მონაწილეობა. 2 დეკემბერს სტუდენტები ბათუმის #2 საჯარო სკოლას ეწვივნენ და შშმ მოსწავლეებს ბათუმის საჯარო ბიბლიოთეკასთან არსებული ამერიკული კუთხე წარუდგინეს. ღონისძიების დასასრულს პროექტის მონაწილეებს ფასიანი საჩუქრები გადაეცა, ხოლო ბსუ-ს სწრაფი კვების ობიექტმა მასპინძლობა გაუწია. პროგრამა მიზნად ისახავდა შეზღუდული შესაძლებლობების მქონე მოსწავლეების საზოგადოებაში ეფექტურად ჩართვას და მათთვის ტექნოლოგიების ხელმისაწვდომობის გაცნობიერებას.

სხვადასხვა სამხედრო დანაყოფის ჯარისკაცებისათვის ბათუმის შოთა რუსთაველის სახელმწიფო უნივერსიტეტში საჯარო ლექციების ციკლი დაიწყო. უმაღლესი საგანმანათლებლო დაწესებულების პროფესორ-მასწავლებლები სამხედრო მოსამსახურეებს ერთი კვირის განმავლობაში ლექციებს წაუკითხავენ ისეთ აქტუალურ საკითხებზე, როგორიცაა: „საბრძოლო ხელოვნების ისტორია“, „გეოპოლიტიკა“, „საერთაშორისო ორგანიზაციები“, „პირველადი გადაუდებელი სამედიცინო დახმარება“, „სურსათი–სარგებელი და საფრთხე“ და „საქართველოს ისტორია“. პროექტი სპორტული შეჯიბრებებით დასრულდება, ღონისძიების ფარგლებში გაიმართება პირველობა მინიფეხბურთსა და მკლავჭიდში.

ბათუმის შოთა რუსთაველის სახელმწიფო უნივერსიტეტში კონფერენცია „უწყვეტი პროფესიული განვითარება აჭარაში: მიღწევები და შედეგები“ გაიხსნა. სამი დღის განმავლობაში სხვადასხვა უმაღლესი საგანმანათლებლო დაწესებულების პროფესორ-მასწავლებლები, რეგიონის 50 საჯარო სკოლის ინგლისური ენის მასწავლებლები, საერთაშორისო და ადგილობრივი არასამთავრობო ორგანიზაციების წარმომადგენლები უწყვეტი პროფესიული განვითარების პროგრამას გაეცნობიან. სესიის მონაწილეები ასევე იმსჯელებენ პროფესიული განვითარების უწყვეტი პროფესიული განვითარების კონცეფციაზე, სახელმწიფო სკოლებში ინგლისური ენის სწავლების აქტუალურ საკითხებსა და ინგლისური ენის მასწავლებლების პროფესიული განვითარების შესაძლებლობებზე. კონფერენცია ბრიტანეთის საბჭოსა და აჭარის განათლების ფონდის ორგანიზებით იმართება.

გაცვლითი პროგრამის „ერასმუს+“ მონაწილეთა შესარჩევი კონკურსი გაიმართა ბათუმის შოთა რუსთაველის სახელმწიფო უნივერსიტეტში. პროექტში მონაწილეობის მისაღებად კონკურსის პირველ ეტაპზე რეგისტრაცია 84-მა მსურველმა გაიარა, მათგან მეორე ეტაპი 55-მა კონკურსანტმა გადალახა, ხოლო მესამე ეტაპი - ტესტირება ინგლისურ ენაში (B1დონე) და მეოთხე ეტაპი - გასაუბრება 26-მა გაიარა. გაცვლითი პროგრამის შესარჩევი კონკურსის მეოთხე ეტაპის გამარჯვებულ სტუდენტებს შემდეგი მიმღები უნივერსიტეტები გამოავლენს: სილესიის ტექნოლოგიურ უნივერსიტეტი, ჩეცინის უნივერსიტეტი, ბიალისტოკის ტექნოლოგიურ უნივერსიტეტი და არისტოტელეს თესალონიკის უნივერსიტეტი.