ახალი ამბები
17.12.2019

სასწავლო ცენტრის „ითიაი ორიათასის“ 10 წლის იუბილესადმი მიძღვნილი კონფერენცია „საქართველო-ბრიტანეთის კულტურულ-საგანმანათლებლო ურთიერთობები“ გაიმართა ბათუმის შოთა რუსთაველის სახელმწიფო უნივერსიტეტში. ღონისძიებას ბსუ-ს რექტორი მერაბ ხალვაში, აჭარის ა.რ. განათლების, კულტურისა და სპორტის მინისტრის მოადგილე ალექსანდრე დავითაძე, საგანმანათლებლო ცენტრის დამფუძნებელი ჯეოფ ჰარდი-გოული, რექტორის მოადგილე თამარ სირაძე, სტუდენტები, პროფესორ-მასწავლებლები და საზოგადოების წარმომადგენლები ესწრებოდნენ. კონფერენციაზე წარმოდგენილი იყო მოხსენებები ისეთ მნიშვნელოვან საკითხებზე, როგორიცაა: მარჯორი და ოლივერ უორდროპები საქართველოში, ბრიტანეთი საქართველოში - 1918-21 წლები, საქართველო-ბრიტანეთის ერთობლივი არქეოლოგიური ექსპედიცია - ურთიერთობის 15 წელი და მულტიმედიის ტექნოლოგიები ინგლისური ენის სწავლებაში.

საქართველოს განათლების, მეცნიერების, კულტურისა და სპორტის მინისტრი მიხეილ ჩხენკელი ბათუმის შოთა რუსთაველის სახელმწიფო უნივერსიტეტის აკადემიური საბჭოს წევრებს, ფაკულტეტის დეკანებს, საგანმანათლებლო პროგრამების, ხარისხის სამსახურის და დარგობრივი დეპარტამენტის ხელმძღვანელებს შეხვდა. შეხვედრას, რომელიც კითხვა-პასუხის რეჟიმში წარიმართა, უნივერსიტეტის რექტორი მერაბ ხალვაში და აჭარის ა.რ. განათლების კულტურისა და სპორტის მინისტრი მაია ხაჯიშვილი ესწრებოდნენ. მინისტრმა პროფესორ-მასწავლებლების შეკითხვებს ამომწურავად უპასუხა.

ბათუმის შოთა რუსთაველის სახელმწიფო უნივერსიტეტის ტურიზმის ფაკულტეტის სტუდენტი თორნიკე ტარიელაძე ნომინაციაში კაცის მთავარი როლის საუკეთესოდ შესრულებისთვის მოყვარულ სტუდენტურ თეატრთა საერთაშორისო ფესტივალის„ნიღაბი 2019" გამარჯვებულია. ფესტივალში საქართველოს სხვადასხვა უნივერსიტეტის თეატრალურ დასებთან ერთად, უნგრეთისა და პოლონეთის თეატრალური დასები მონაწილეობდნენ. კომპეტენტურმა ჟიურიმ 10 ნომინაციაში გამარჯვებულები გამოავლინა და სპეციალური პრიზები გადასცა.